ҒАМҚОРЛЫҚ ДЕГЕН УСЫНДАЙ-АҚ БОЛАР
Халқымыздың ең таптырмайтуғын қәстерли үрп-әдетлериниң бири, жәрдемге мүтәж инсанларға бийминнет қәўендерлик ҳәм ғамқорлық көрсетиў болып табылады. Әсиресе, кем тәмийинленген, жумыссызлықтан қыйналып атырған ҳаял-қызлардың бәнтлигин тәмийинлеўге қайырқомлық көрсетиў, бүгинги күнде мәмлекетлик сиясат дәрежесине көтерилгени айқын ҳақыйқат.
Дурыс, өмирдиң қатал нызамлары кимди болса да албыратып, аўыр сынаққа дусластыратуғынын ҳеш бир бенде қыялына келтирмейди. Ал, бундай сынаққа түскенде, перзентлери, шаңарағы бахты ушын қасарысып, тырмасып алдыға умтылғанлар, әззилик етип сынбайды. Керисинше, қолынан келетуғын өнери арқалы, ўақытша қыйыншылықтан шығысып кеткенлер қаншама дейсиз. Солай екен, тек ғана мийнет етип, машқаладан шығысаман дегенлерге мәмлекетимиз тәрепинен қоллап-қуўатлаўлар жетерли дәреже де берилмекте.
Жақында, Елликқала районында Қарақалпақстан Республикасы Жоқарғы Кеңесиниң Баслығы А.Орынбаевтың көшпели қабыллаўында бир топар ҳаял-қызларға субсидия тәризинде заманагөй тигиў машиналары тапсырылды. Ҳақыйқый ғамқорлық деген усындай-ақ болар. Ендигиден былай, тигиў машиналары ийелери, өз-өзин жумыс пенен бәнт етип, шаңарағына дәрамат келтириў имканиятына ийе болды.
Өмирдиң тосаттан таярлаған қыйыншылықларына бойсынбай киятырған Яқуджан Ҳаджиева райондағы «Иқбол» мәкан пуқаралар жыйынында жасайды. Бир ул ҳәм қызы бар.
— Ел басшыларына рахмет. Ҳал-жағдайымыздан хабар алып, қәўендерлик етиўден кемиси жоқ. Мәкан пуқаралар жыйыны қолдан келген жәрдемин берип, қайырқомлық көрсетип тур. Журт қатары таза имараттың тырнағын қаладық. Питпей атырған кемис-қутықларын жамаў аңсатқа түспеди. Бирақ, усыған қарамастан питкерип жасап атырмыз. Идиралды перзентим аўзыма ас салғанына шүкиршилигим көп. «Қолдан бергенге қус тоймас» дегендей, көптен берли заманагөй тигиў машиналы болсам, деп әрман етер едим. Қолымнан көрпе-төсек, кийим-кеншек тигиў келеди. Тәўекелге бел буўып, район басшыларына мүрәжат етиўге бел байладым. Мүрәжатым бойынша Қарақалпақстан Республикасы Жоқарғы Кеңеси Баслығының көшпели қабыллаўында субсидия тәризинде тигиў машинасы берилди. Президентимизге, Республикамыз басшыларына айтар алғысым шексиз. Халқы қәдирленген елде жасап атырғанымнан бахтиярман. Буннан былай, өзимниң бәнтлигимди тәмийинлеп, қарыйдарлардан буйыртпа алып жумыс баслаўды жолға қоймақшыман, - дейди қуўаныштан толып-тасқан Яқуджан Ҳаджиева.
Биз, хошласып шығып баратырғанымызда, бир топар ҳаял-қызлар кирип келди. Олар, үй ийесине кийим тиктириўге буйыртпа бериў ҳәм қызларын шәкиртликке алып келгенлигин айтқанында, Я. Ҳаджиеваның баслаған иси сәтине түсетуғынлығына исеним арттырдық.
Қ.РЕЙМОВ,
арнаўлы хабаршымыз.
Елликқала районы.
