КЕСЕЛЛИККЕ ҚАРСЫ ГҮРЕС ДАЎАМ ЕТПЕКТЕ
Ҳәзирги ўақытта пүткил дүнья жүзин тәшўишке салып атырған коронавирус кеселлиги инфекциясының тарқалыўының алдын алыў бойынша барлық мийнет жәмәәтлери қатарында «Нөкис халықаралық аэропорты» жуўапкершилиги шекленген жәмийетинде де бир қатар жумыслар әмелге асырылмақта.
Спецификалық жумыс жағдайларына байланыслы жумысшылар өз ўазыйпаларын гезекпе-гезек атқармақта. Аэропорт жумысшылары арасында коронавирус кеселлиги ҳәм оның ақыбетлери бойынша кең көлемли үгит-нәсият ҳәм түсиндириў жумыслары алып барылмақта. Азанғы ҳәм кешки пайытта жумысқа келиўшилер менен қайтыўшылардың дене ыссылығы қәнигелер тәрепинен ҳәр күни тексерилип барылады. Буннан тысқары, ҳәр бир жумыс орны ҳәр қыйлы қосымша қолланбалар менен тәмийинленген. Сондай-ақ, вирустың тарқалыўының алдын алыў мақсетинде ҳәр бир хана, жолаўшылардың жүриў орынлары арнаўлы дәрилер менен дезинфекцияланбақта. Арнаўлы өрт өшириў машиналары қала ишиндеги имаратларды, көшелер ҳәм жолларды дезинфекциялаў жумысларына белсене қатнаспақта.
Жуўмақластырып айтқанда, пүткил дүнья жүзине тарқалып атырған коронавирус пандемиясына қарсы гүрес ҳәр тәреплеме даўам етпекте. Карантин ҳәм санитария-гигиеналық қағыйдаларға қатаң әмел етиў ҳәр биримиздиң ўазыйпамыз екенлигин умытпайық!
Р.АЛЛАНИЯЗОВ,
«Нөкис халықаралық аэропорты» ЖШЖ кәсиплик аўқамы шөлкеминиң баслығы.
