ПӘН АЙЛЫҒЫ ТӘБИЯТ ПЕНЕН БАЙЛАНЫСЛЫ
Билимлендириў тараўы келешек әўлад тәрбиясындағы баслы итибар қаратылып атырған мәселе. Бул тәлим-тәрбия тараўындағы барлық хызметкерлерге үлкен жуўапкершилик жүклемекте.
Оның есесине оқытыўшыларға айрықша итибар олардың мийнетлери хошаметленип атыр.
Оқыў жылының басланыўы менен ҳәр бир ай белгили бир пән айлығына арналыўы дәстүрге айланды. Оқыў жылының биринши сентябрь айы география пән айлығы деп белгиленди.
География пәни қызықлы пәнлердиң бири. Бул пәнди ең дәслеп оқыўшыларға үйретип баслаған ўақытта-ақ тәбият пенен байланыста боламыз. Оқыўшылар ана-тәбият, тәбияттағы ҳәр қыйлы қубылыслар, материклер, дәрьялар, көллер, таўлар, океанлар ҳаққында, сондай-ақ, дүнья мәмлекетлери, олардың сиясий ҳәм экономикалық жағдайы ҳаққында мағлыўматлар менен танысады.
Хожели районы ХББне қараслы 35-санлы мектепте география пән айлығы қызықлы ҳәм мазмунлы өтти. Оқыўшылар өзлериниң бар билимлерин пән айлыққа арнап өткерилген викториналарда көрсетти. 8-класс оқыўшылары арасында «Жер улыўмалық үйимиз», 9-класс оқыўшылары арасында «Ойлан, излен, тап!» викториналары шөлкемлестирилди. 16-сентябрь Дүнья жүзилик Озон қатламын қорғаў күни мүнәсибети менен 5-6-класс оқыўшыларына видеороликлер көрсетилди, дөңгелек стол әтирапында сәўбетлер алып барылды. Оқыўшылар озон қатламы не екенлиги, оны не ушын қорғаўымыз керек екенлиги ҳаққында терең билимге ийе болды. Пән айлық «География пәнлер султаны» деп аталған байрам кешеси менен жуўмақланды.
Сапура ЕШМУРАТОВА,
Хожели районы 35-санлы мектептиң тарийх-география пәни оқытыўшысы.
