ИЙГИЛИКЛИ БАСЛАМА ТИЙКАРЫНДАҒЫ ЖУМЫСЛАР БАСЛАНДЫ
Жақында Өзбекстан Республикасы Президентиниң кеңесгөйи Т.Худайбергенов ҳәм Қарақалпақстан Республикасы Жоқарғы Кеңеси Баслығы А.Орынбаевтың басшылығында республикамыздағы барлық қала ҳәм районлардың социаллық-экономикалық жағдайын және де жақсылаў, мәҳәллелерде әмелге асырылып атырған жумысларды системалы тәризде қадағалаў, сондай-ақ, халықтың мүрәжатларын үйрениў, оларға әмелий жәрдем көрсетиў бойынша әмелге асырылып атырған жумыслардың нәтийжелилигин арттырыўға арналған видеоселектор мәжилиси өткерилген еди.
Мәжилисте айрықша итибар ҳәр бир район, ҳәр бир мәҳәлле кесиминде социаллық қорғаўға мүтәж, аўыр шараятта жасап атырған шаңарақларды қоллап-қуўатлаў, олардың турақ жайларын оңлап бериўге қаратылып, бул бойынша дүзилген исши топар тәрепинен олардың мәнзилли дизимлери қәлиплестирилди. Оларды қыс мәўсиминен зыянсыз алып шығыў ушын әмелий жәрдемлер көрсетиў бойынша сектор басшылары, депутатлар ҳәм мәҳәлле белсендилерине бир қатар ўазыйпалар белгилеп берилди.
«Меҳир ҳәрекети» шеңбериндеги белгиленген ўазыйпалардың орынланыўын тәмийинлеў мақсетинде дүзилген исши топар тәрепинен Қоңырат районындағы жәми 27526 хожалық үйренип шығылып, олардан 321 шаңарақтың социаллық жәрдемге мүтәж екенлиги анықланған.
Жақында Қарақалпақстан Республикасы Жоқарғы Кеңеси Баслығының орынбасары Р.Сапарбаевтың басшылығында район ҳәкимлигиниң мәжилислер залында райондағы социаллық жәрдемге мүтәж 321 шаңарақтың социаллық машқалаларын үйрениў ҳәм қәўендерлик қаржылары есабынан турақ жайларын оңлап бериўге әмелий жәрдем көрсетиўге бағышланған мәжилис өткерилди. Оған райондағы төрт сектор басшылары, район ҳәкиминиң орынбасарлары, аўыл ҳәм мәкан пуқаралар жыйынларының баслықлары, ҳәким жәрдемшилери ҳәм мәкеме, кәрхана басшылары қатнасты. Мәжилисте секторлар кесиминде көрсетилген ҳәр бир хожалықтың жағдайынан хабар алыў, оларға материаллық жәрдемлер көрсетиў, турақ жайларын оңлап бериў ҳәм усыныслар киргизиў бойынша депутатлар ҳәм район белсендилерине ўазыйпалар белгилеп берилди.
С.ОРАЗЫМБЕТОВ,
өз хабаршымыз.
Қоңырат районы.
СҮЎРЕТТЕ: мәжилистен көринис.
