ҲӘР БИР МҮРӘЖАТ АРТЫНДА ИНСАН ТӘҒДИРИ
Усы жыл 23-октябрь күни Жаслар орайында Қарақалпақстан Республикасы Жоқарғы Кеңесиниң Баслығы А.Орынбаевтың Нөкис қаласындағы жеке қабыллаўы болып өтти.
Қабыллаўда тийкарынан пуқараларды бүгинги күни қыйнап киятырған социаллық қоллап-қуўатлаў, исбилерменлик жумысында ушырасып атырған машқалалар, бәнтлик, медициналық жәрдем, электр ҳәм газ тәмийнаты, жол қурылысы, ишимлик ҳәм ақаба суў жеткерип бериў бойынша мүрәжатлар билдирилди.
Мәселен, «Қутлы мәкан» мәкан пуқаралар жыйыны турғыны Гүлназ Айтымбетованың үйиниң төбесин бастырып бериў бойынша мүрәжаты унамлы шешилип, бул жумыс ислеп берилетуғын болды. «Әмиўдәрья» мәкан пуқаралар жыйынында жасаўшы Ерназар Мақсетов веб-программалаў ҳәм мәлимлеме технологиясы бағдарына қызығатуғынлығын билдирип, әмелий жәрдем сорап мүрәжат етти. Оның бул қызығыўшылығы Жоқарғы Кеңес Баслығы тәрепинен қоллап-қуўатланып, оған компьютер программалары ҳәм сайт жаратыўшы заманагөй компьютер алып берилетуғын болды.
Соның менен бирге, Гүлжайна Айназарованың екинши қәнигелик бойынша шәртнама төлеми төлеп берилип, жумысқа орналастырылды. Айгүл Жуманазарова менен Салтанат Төлегенованың турақ жайын оңлаўға қаржы ажыратылатуғын болса, Майрамгүл Мадреймоваға материаллық жәрдем пулы берилетуғын болды.
Улыўма алғанда, қабыллаў даўамында пуқаралардан 300ден аслам мүрәжат келип түсти ҳәм басым көпшилиги унамлы шешимин тапты. Ўақыт талап ететуғын мүрәжатлар тийисли тараў басшыларына тапсырылды ҳәм олардың орынланыўы Қарақалпақстан Республикасы Жоқарғы Кеңеси Баслығының жеке қадағалаўына алынды.
Солай етип, ҳәр бир мүрәжат артында инсан тәғдири бар. «Инсан қәдири ушын» принципин өзинде жәмлеген бундай қабыллаўлар басқа районларда да болып өтеди.
Қабыллаўға Өзбекстан Республикасы Президенти кеңесгөйиниң биринши орынбасары У.Муҳаммадиев қатнасты.
Қарақалпақстан хабар агентлиги.
