АЎЫЛ ҲАЯЛ-ҚЫЗЛАРЫ ХОШАМЕТЛЕНДИ
Нөкис қаласында «Халықаралық аўыл ҳаял-қызлары» күни мүнәсибети менен илаж болып өтти.
Онда түрли тараўларда жемисли мийнет етип атырған ҳаял-қызлар қатнасты.
Илажда Қарақалпақстан Республикасы Министрлер Кеңеси Баслығының орынбасары — шаңарақ ҳәм ҳаял-қызлар комитетиниң баслығы М.Ахмедова, Самарқанд ўәлаяты ҳәкиминиң орынбасары — шаңарақ ҳәм ҳаял-қызлар басқармасының баслығы З.Рахманова, O’zLiDeP Қарақалпақстан Республикасы Кеңеси баслығының биринши орынбасары — аппарат басшысы К.Артықов шығып сөйлеп, бүгинги күни аўыллық жерлерде жасап атырған ҳаял-қызлардың машқалаларын сапластырыў, олардың абадан турмыс кешириўи ушын жаратылып атырған шараятларға тоқтап өтти. Елимизде әмелге асырылып атырған реформаларда олардың мүнәсип үлеси бар екенлиги мақтаныш етилди.
Атап өтилгениндей, БМШ Бас ассамблеясы тәрепинен аўыллық аймақларда жасап атырған ҳаял-қызлардың машқалаларына кең жәмийетшиликтиң итибарын қаратыў, олардың турмыс шараятларын жақсылаў мақсетинде резолюция қабыл етилип, усы тийкарда 15-октябрь — Халықаралық аўыл ҳаял-қызлары күни деп белгиленди. Ҳәр жылы усы сәне елимизде кең түрде белгиленип келинбекте.
Илажда бир топар ҳаял-қызларға шөлкемлестириўшилер тәрепинен саўғалар тапсырылды.
Қатнасыўшыларға көркем-өнер шеберлериниң концерт бағдарламасы қойып берилди.
Д.АБИБУЛЛАЕВ,
Қарақалпақстан хабар агентлигиниң шолыўшысы.
М.ҲӘБИЙБУЛЛАЕВтың түсирген сүўрети.
