КЕМШИЛИКЛЕР СЫНҒА АЛЫНЫП, ЖУЎАПКЕРЛЕРГЕ ЎАЗЫЙПАЛАР БЕЛГИЛЕНДИ
Соңғы жыллары Қараөзек районында Президентимиздиң арнаўлы пәрман ҳәм қарарлары тийкарында халық хожалығының барлық тараўларын раўажландырыў ҳәм сол арқалы елимиздиң абаданлығына ерисиў бойынша бир қатар ири өзгерис ҳәм жаңаланыўлар жүз бермекте.
Атап айтқанда, район аймағында бир неше ири санаат кәрханалары, исбилерменлик субъектлери ҳәм социаллық объектлер бой тиклеп халық ийгилиги ушын хызмет етпекте. Деген менен, айырым өз исине бийпәрўа тараў басшыларының жуўапкерсизлиги себепли, жумысларда бослықлар пайда болып, бул айырым пуқаралардың наразылығына себеп болмақта.
Қарақалпақстан Республикасы Жоқарғы Кеңесиниң Баслығы Аманбай Орынбаев Қараөзек районының социаллық-экономикалық жағдайын жақсылаў, аймақтың инфраструктурасын еле де раўажландырыў, халықтың абадан турмысын тәмийинлеў жолында алып барылып атырған жумыслар менен танысыў мақсетинде усы аймақта болды. Ең дәслеп Жоқарғы Кеңес Баслығы А.Орынбаев «Қутлы мәкан» мәкан пуқаралар жыйынында жайласқан 2-санлы ҳәм 28-санлы улыўма орта билим бериў мектеплеринде алып барылып атырған ири оңлаў жумысларын көзден өткерди.
Усы жерде айтып өтиў тийис, бул еки мектеп имаратларында қурылыс жумыслары белгиленген мүддеттен артта қалып атырған болып, Жоқарғы Кеңес Баслығы қурылыс жумысындағы бул олқылықларды тез арада сапластырыў ҳәм егер, зәрүр болса тийисли жуўапкерлерди белгиленген тәртипте жуўапкершиликке тартыў илажларын көриў бойынша ҳуқық қорғаў уйымы ўәкиллерине тапсырмалар берди.
Буннан соң Қарақалпақстан Республикасы Жоқарғы Кеңесиниң Баслығы Аманбай Орынбаев район ҳәкимлигинде барлық министрлик, комитет, басқарма, шөлкем басшылары, сондай-ақ, райондағы мәкеме, шөлкем, кәрхана басшылары ҳәм район белсендилери қатнасыўында мәжилис өткерди.
Онда Қараөзек районын социаллық-экономикалық жақтан раўажландырыў, бул бағдарда алып барылып атырған жумыслар ҳәм айырым тараў ўәкиллери тәрепинен жол қойылып атырған қәте-кемшиликлер айрықша атап өтилди.
Өткерилген мәжилисте Жоқарғы Кеңес Баслығы А.Орынбаев республикамыздағы коммерциялық банклер өз имканиятынан жеткиликли дәрежеде пайдаланбай атырғанлығы, бюджет қаржыларының мақсетсиз жумсалыўы ҳәм ажыратылып атырған жеңиллетилген кредитлер мүтәж пуқараларға берилместен, мәнзилсиз жумсалған жағдайлары ушырасып атырғанлығына тоқтап өтти. Соның менен бирге,мәмлекетлик инвестиция ҳәм басқа бағдарламалар тийкарында алып барылыўы тийис қурылыс-оңлаў жумысларын әмелге асырыўдағы кемшиликлер, райондағы қурылыс ҳәм абаданластырыў жумыслары талап дәрежесинде емеслиги бойынша жуўапкерлердиң жумысларына сын көзқарастан баҳа берилди.
Мәжилис даўамында Қарақалпақстан Республикасы Жоқарғы Кеңесиниң Баслығы Аманбай Орынбаев Қараөзек районын социаллық-экономикалық жақтан еле де раўажландырыў бойынша анық илажлар көриў зәрүрлигин атап өтип, әсиресе, бул бағдарда районда жаңа жумыс орынларын жаратыў, аймаққа сырт ел инвестицияларын тартыў, санаат, аўыл хожалығы, хызмет көрсетиў тараўларында жойбарларды иске түсириў, шаңарақлық исбилерменликти раўажландырыў, социаллық, өндирис, жол, ишимлик суў объектлеринде қурылыс оңлаў жумысларын жеделлестириў кереклигине тоқталып өтти.
Сондай-ақ, мәжилисте быйылғы жылдың жуўмағына шекем Қараөзек районын социаллық-экономикалық раўажландырыў ҳәм халықтың абадан турмыста жасаўын тәмийинлеўге республикалық бюджеттен жәми 10,5 млрд. сумлық қаржы ажыратылатуғынлығы атап өтилди.
Мәжилис соңында көрилген мәселелерди райондағы алып барылып атырған жумысларды ҳәм берилген тапсырмалардың орынланыўын тәмийинлеў ушын Қарақалпақстан Республикасы Жоқарғы Кеңесиниң Аграр, суў хожалығы, тәбиятты қорғаў ҳәм экология мәселелери комитетиниң баслығы Д.Утамбетовты жуўапкер етип бекитти.
Қарақалпақстан хабар агентлиги.
