КОРРУПЦИЯҒА ҚАРСЫ ГҮРЕСИЎ — ҲӘММЕМИЗДИҢ МИННЕТИМИЗ
Жасыратуғыны жоқ, жәмийетте сондай унамсыз иллетлер ушырасады, ол белгили бир тараўға емес, ал, пүткил жәмийеттиң раўажланыўына тосқынлық етеди. Мәмлекетти ишинен жемиретуғын әне усындай иллет парахорлық ҳәм коррупция болып табылады. Бул зыянлы иллет себебинен көплеген мәмлекетлердиң кризиске түскени тарийхтан мәлим.
Раўажланыўдың жаңа басқышына қәдем атып атырған Жаңа Өзбекстан ушын коррупцияның ҳәр қандай формасындағы көриниси реформалардың жеделлесиўин пәсейттириўи менен қәўипли десек алжаспаймыз. Сонлықтан да, Өзбекстан Республикасы Президенти Ш.Мирзиёев тәрепинен «Коррупцияға қарсы гүресиў ҳаққында»ғы Нызамы қабыл етилди. Нызам нормаларын нәтийжели орынлаў мақсетинде, жәмийет ҳәм мәмлекет турмысының барлық тараўларында коррупцияның алдын алыўға тийисли илажларды өз ўақтында ҳәм сапалы әмелге асырыў ушын Президентимиздиң 2017-жыл 2-февральдағы қарары менен «2017-2018-жылларға мөлшерленген коррупцияға қарсы гүресиў бойынша мәмлекетлик бағдарламасы» қабылланды. Улыўма алғанда, соңғы жылларда исленген жумыслар анализи халықтың ҳуқықый санасы ҳәм мәдениятын арттырыўға, жәмийетте коррупцияға маўасасыз мүнәсибетти қәлиплестириўге бағдарланған илажлар көрилгенин көрсетип тур.
Реформаларды әмелге асырыў шеңберинде пуқаралардың ҳуқық ҳәм мәплерин қорғаў, мәмлекетлик ҳәкимият, басқарыў уйымлары искерлиги ашықлығын, жәмийет ҳәм парламент қадағалаўын тәмийинлеў механизмлери жетилистирилди, сондай-ақ, ҳуқық қорғаў, суд уйымлары искерлигиниң ҳуқықый тийкарлары реформаланды. Әлбетте, орынланған жумыслар салмақлы. Лекин, биз кешеги исленген жумысымыздың нәтийжеси менен шекленип қалмаўымыз тийис.
Коррупцияны бир яки еки мәкемениң ҳәрекети менен жоқ етип болмайды. Унамсыз иллетке барлық пуқараларымыз, кең жәмийетшилик оған қарсы биргеликте гүресип, оның тамырларын жоқ етиўге кирисилсе ғана унамлы нәтийжеге ерисиў мүмкин.
Д.УРДАБАЕВА,
Нөкис қалалық ПҲАЖ бөлиминиң инспекторы.
