МҮРӘЖАТЛАР ӨЗ ШЕШИМИН ТАБАДЫ
Шымбай районында Тахтакөпир, Қараөзек, Шымбай, Бозатаў, Кегейли ҳәм Нөкис районы пуқаралары ушын Қарақалпақстан Республикасы Жоқарғы Кеңесиниң Баслығы Аманбай Орынбаевтың жеке қабыллаўы болып өтти.
Қабыллаўға Өзбекстан Республикасы Президенти кеңесгөйиниң биринши орынбасары У.Мухаммадиев қатнасты. Өткерилген қабыллаўда жеке қабыллаўға жазылған пуқаралардың мүрәжатлары тыңланып, өз орнында шешим табыў илажлары көрилди.
Пуқаралар тәрепинен тийкарынан медицина, бәнтликти тәмийинлеў, билимлендириў, исбилерменлик тараўларындағы ушырасып атырған машқалалар, газ, электр энергиясы, ишимлик суўы ҳәм ишки жоллар бойынша мүрәжатлар билдирилди.
Қабыллаўда 469 мәселеде 456 мүрәжат келип түскен болып, соннан 242 машқала орнында унамлы шешимин тапты, ўақыт талап етилетуғын мүрәжатлар Қарақалпақстан Республикасы Жоқарғы Кеңеси Баслығының жеке қадағалаўына алынып, қысқа мүддетлерде унамлы шешиў бойынша тийисли тараў басшыларына тапсырмалар берилди.
Атап айтқанда, Тахтакөпир районы турғыны Баўыржан Қыдырбаевқа 15 миллион сум материаллық жәрдем берилген болса, Светлана Мадреймованың перзентине контракт пуллары төлеп берилетуғын болды. Бозатаў районы турғыны Гүлсара Исметованың турақ жайының кадастр ҳүжжетлери жоқ екенлиги бойынша еткен мүрәжаты оның кем тәмийинленгенлиги есапқа алынып, сол орынның өзинде кадастр хүжжетлери бийпул рәсмийлестирилип берилди.
Шымбай районы «Абат» МПЖ турғыны Кеўлимжай Разбековтың МПЖ аймағындағы көшелерге, Қараөзек районы «Есим өзек» АПЖ турғыны Сүйеўбай Есжановтың аўыл аймағына ЩПС (қум щебен араласпасын) төсеў бойынша еткен мүрәжатлары да сол орынның өзинде унамлы шешилип, аймаққа керекли болған ЩПС материалы жеткерип берилетуғын болды.
Кегейли районы «Ақтуба» АПЖ турғыны болған көп балалы ана Феруза Турғанбаеваның турақ жай бойынша еткен мүрәжаты унамлы шешилип, «Жылўанжап» МПЖдан 4 ханалы социаллық турақ жай берилди.
Пуқаралардың машқалаларын шешиў жолындағы бундай қабыллаўлар елимизде «инсан қәдири ушын» принципинде алып барылып атырған реформалардың және бир мысалы, халықты разы етиў сиясатының әмелий көриниси болып табылады.
Қарақалпақстан хабар агентлиги.
