ТИЙКАРҒЫ РЕЖЕЛЕР ХАЛЫҚТЫҢ АБАДАНЛЫҒЫНА БАҒДАРЛАНАДЫ
Қарақалпақстан Республикасы Жоқарғы Кеңесиниң Баслығы Аманбай Орынбаев Нөкис районының социаллық-экономикалық раўажланыўының барысы, районда халықтың абадан турмысын тәмийинлеў бағдарындағы жумыслар менен танысыў мақсетинде районда болды.
Дәслеп аймақта гүзги-қысқы мәўсимге таярлық көриў бойынша алып барылып атырған жумысларды еле де жеделлестириў бойынша көрсетпелер берилди. Сондай-ақ, «Саманбай» АПЖда жайласқан 19-санлы улыўма билим бериў мектебиниң қосымша жаңа имараты қурылыс жумыслары менен танысты. Қурылыс жумысларындағы артта қалыўшылықты сапластырыў, тийисли тараў басшыларының жуўапкершилигин күшейтиў кешиктирип болмайтуғын ўазыйпалардың бири екенлигин атап өтти.
Буннан соң, Қарақалпақстан Республикасы Жоқарғы Кеңесиниң Баслығы Аманбай Орынбаев министрлик, комитет, басқарма, шөлкем басшылары, сондай-ақ, районның белсендилери, депутатлар, сектор басшылары қатнасыўында мәжилис өткерди.
Мәжилисте районның социаллық-экономикалық ҳәм инфраструктуралық жағдайын жақсылаў бағдарында әмелге асырылып атырған жумыслар, мәҳәлле аймақларын абаданластырыў, халықтың жасаў шараятын еле де жақсылаў бағдарындағы кемшиликлер ҳаққында сөз етилди.
Жоқарғы Кеңес Баслығы тәрепинен мәмлекетлик бағдарламалардың орынланыўы, бюджет қаржыларының мақсетсиз жумсалыўы, ажыратылған субсидиялардың талан-тараж етилгенлиги, есабатларда қосып жазыўлар, нызамбузыўшылық жағдайлары ушырасып атырғанлығы да атап өтилип, тийисли тараў басшыларына жүзеге келген жағдайды ҳәр тәреплеме таллап, тийисли жуўмақ шығарыў лазымлығына кеңнен тоқтады. Орын алған кемшиликлерди қысқа мүддетлерде сапластырыў бойынша жуўапкерлерге анық ўазыйпалар белгиленди.
Қарақалпақстан хабар агентлиги.
