ЖАСЛАРҒА СУБСИДИЯ ТИЙКАРЫНДА ӘСБАП-ҮСКЕНЕЛЕР БЕРИЛДИ
Нөкис қаласындағы Жаслар орайында «Жаслар дәптери»не киргизилген жаслардың өзин-өзи бәнт етиўи мақсетинде субсидия тийкарында әсбап-үскенелерди тапсырыў мәресими болды.
Илажға Нөкис қаласындағы секторлардың басшылары, жаслар ҳәм олардың ата-аналары қатнасты.
Жаслар ислери агентлиги директорының орынбасары Ф.Аблаяров, агентликтиң Қарақалпақстан Республикасы басқармасының баслығы П.Мақсетбаев ҳәм басқа да шығып сөйлеўшилердиң атап өткениндей, Нөкис қаласы жасларының социаллық-экономикалық машқалаларын, усыныс ҳәм тилеклерин үйрениў, оларды шешиў бағдарында бир қатар жумыслар әмелге асырылмақта. Нәтийжеде бул бойынша «Нөкис қаласының тәжирийбеси» жаратылды.
Жаслар жетекшилери менен биргеликте 64 мәкан пуқаралар жыйынында үйме-үй хатлаў жумыслары алып барылып, 14-30 жас аралығындағы 74 мың 683 жастың балансы толық қәлиплестирилди. Усы тийкарда анықланған ҳәр он бесинши жумыссыз ҳәм социаллық жәрдемге мүтәж болған 4 мың 820 пуқара 19 көмек түри бойынша «Жаслар дәптери»ниң электрон платформасына киргизилди.
Буннан тысқары, Нөкис қаласында «Жаслар дәптери»не киргизилгенлерге әмелий жәрдем көрсетиў жумыслары басланып, олардың социаллық-экономикалық машқалаларын шешиў илажлары көрилмекте. Жаслар ислери агентлиги қаржылары есабынан 311 жастың мобилизациялық шақырыў резервиндеги хызмети төлеми, 176 жастың айдаўшыларды таярлаў оқыў курсының қәрежетлери ушын жәми 2,2 миллиард сум төлеп берилди.
Илаж соңында 677 жасқа субсидия тийкарында әсбап-үскенелер тапсырылды.
Д.АБИБУЛЛАЕВ,
Қарақалпақстан хабар агентлигиниң шолыўшысы.
