КЕЛЕСИ БАСҚЫШҚА ЖОЛЛАМА АЛДЫ
Беруний районындағы 59-санлы улыўма билим бериў мектебинде Өзбекстан Республикасы Қорғаныў министриниң кубоги ушын әскерий спорт ойынлары жарысы болып өтти.
Район ҳәкимлиги, Қорғаныў бөлими, Халық билимлендириў бөлими, Өзбекстан Республикасы Қорғаныўға көмеклесиўши «Ватанпарвар» шөлкеминиң районлық оқыў спорт-техника клубы менен биргеликте шөлкемлестирилген жарыс қатнасыўшылары мергенлик, сапта жүрип қосық айтыў, әскерийлестирилген эстафета, АК-74 ти ажыратыў ҳәм жыйнаў басқышлары бойынша беллести.
Жасларды әскерий Ўатанды сүйиўшилик рухында тәрбиялаў, олардың әскерий хызметке болған қызығыўшылығын арттырыў, бос ўақытларын мазмунлы өткериў мақсетинде шөлкемлестирилген жарыс жуўмағында 15-санлы улыўма билим бериў мектебиниң командасы биринши, 64-санлы улыўма билим бериў мектебиниң командасы екинши, 69-санлы улыўма билим бериў мектебиниң командасы үшинши орынларды ийеледи.
Жеңимпаз команда жарыстың Қарақалпақстан Республикасы басқышына жоллама алды.
Қарақалпақстан хабар агентлиги.
