ЖЕТЕКШИЛЕРГЕ ПЛАНШЕТ САЎҒА ЕТИЛДИ
Жаслар менен ислесиўдиң жаңаша механизмлерин енгизиў, жаслардың машқалаларын тиккелей мәҳәллелерде шешиў, билимлендириў мәкемелеринде руўхый-ағартыўшылық ҳәм тәрбиялық жумыслардың нәтийжелилигин және де арттырыў мақсетинде мәмлекетимиздиң барлық аймақларында Өзбекстан Республикасы Президентиниң 2022-жыл 19-январьдағы «Мәҳәллелерде жаслар менен ислесиў системасын түп-тийкарынан жетилистириў илажлары ҳаққында»ғы қарары тийкарында жаслар жетекшиси лаўазымы енгизилген еди.
Бүгинги күнге келип, республикамыздың барлық мәҳәллелеринде жаслар жетекшилери өзлериниң жумысларын баслап жиберди. Мине, усы жетекшилердиң нәтийжели ислеўин тәмийинлеў мақсетинде, район ҳәкимликлери тәрепинен олар ҳәр тәреплеме қоллап-қуўатланып, жумыс ислеўи ушын қолайлы шараятлар жаратылып берилмекте.
Тахтакөпир ҳәм Кегейли районы ҳәкимликлери де орынларда жаслар жетекшилериниң жумыс нәтийжелилигин арттырыў мақсетинде, мәҳәллелердеги жетекшилерине арнаўлы бөлмелер ажыратып, оларға заманагөй жумыс қуралларын саўға етпекте.
— Районымыз бойынша 17 аўыл ҳәм мәкан пуқаралар жыйыны болып, бүгинги күни олардың барлығында да жаслар жетекшилери жумыс алып бармақта,-дейди бизге Тахтакөпир районы ҳәкиминиң Жаслар сиясаты, социаллық раўажландырыў, руўхый-ағартыўшылық ислер бойынша орынбасары Шыныбек Бектурғанов. — Алдағы ўақытлары жетекшилерди арнаўлы белгиге ийе кийимлер менен тәмийинлеў бойынша буйыртпа берип қойыппыз.
Әлбетте, район ҳәкимликлериниң бундай қоллап-қуўатлаўы олардың жумыс нәтийжелилигиниң артыўына өзиниң унамлы тәсирин көрсетеди деп ойлаймыз.
Әдилбай Оразов,
Қарақалпақстан хабар агентлигиниң шолыўшысы.
