МӘҲӘЛЛЕ ЖАСЛАРЫ ӘМЕЛИЙ ИЛАЖЛАРДА
Усы жыл 19-январь күни Президентимиздиң «Мәҳәллелерде жаслар менен ислесиў системасын түп-тийкарынан жетилистириў илажлары ҳаққында»ғы қабыл етилген қарарында мәҳәлле жасларының бос ўақытларын мазмунлы шөлкемлестириў, олардың машқалаларын жақыннан үйрениў ҳәм мәҳәллелерде шешиў сыяқлы бир қатар ўазыйпалар белгиленип өтилген.
Усыған байланыслы мәҳәллелерде жаслар жетекшилериниң искерлиги старт алыўы менен мәҳәлле жаслары ушын жаңаша аймақ ҳәм жаңаша майдан пайда болды. Бул бағдардағы дәслепки әмелий илажлар Әмиўдәрья районындағы «Бай аўыл» мәкан пуқаралар жыйыны аймағындағы l6-санлы мектептиң спорт залында мәҳәллелердеги жәмлеспеген жаслар арасында болып өткен шахмат ҳәм стол тенниси жарыслары менен басланды. Жүзден аслам жаслар қатнасқан бул жарысларда олар қызғын беллесиўге түсти. Қәбилетли ҳәм инталы жаслар сол аймақта жайласқан районлық Мәденият орайында зийреклик интеллектуал турнириниң «Жаслар ислери агентлиги кубогы» ушын болып өткен таңлаўға да белсене қатнасты. Күшли билим, кең пикирди талап етиўши турнирде 300ге жақын аўқам жаслары белсене қатнасып, өз қәбилетлерин жүзеге шығарыўға ҳәрекет етти. Исбилерменлик — бүгин жасларымызды қызықтыратуғын айрықша тараў. Себеби, олар ушын мәмлекетимизде жаратылып атырған мүмкиншиликлер нәтийжесинде бүгин көплеген жасларымыз бул тараўда да жоқары табысларды ҳәм нәтийжелерди қолға киргизип келмекте. Соның ушын да, мине усы тараўға қызығыўшы жасларымыз ушын «Шеберлик сабақлары» шөлкемлестирилди. Онда жаслар өз исбилерменлигин баслаўы, оны жүргизиўи, ушырасатуғын қыйыншылық ҳәм тосқынлықларды қалайынша жеңиўи бойыншада пайдалы ҳәм унамлы мәсләҳәт ҳәм мағлыўматларға ийе болды.
Сондай-ақ, «Саламат ана — саламат бала» ураны тийкарында «Чайкөл» мәкан пуқаралар жыйыны аймағында жайласқан 22-санлы мектептиң спорт залында қызлар арасында волейбол бойынша өткерилген жарыста қызларымыз әдеўир таярлықлар менен келгенлигин көрсетти. Райондағы Санлы технологиялар орайында болса, робототехника, 85 тараўларына қызығыўшы жаслардың билимин арттырыўға байланыслы ушырасыў өткерилди. Онда жаслар технология әлеми ҳаққындағы бир қатар жаңалық ҳәм мағлыўматларға ийе болды. Илажлар районның «Қыпшақ» АПЖ аймағында l00ге жақын жаслар қатнасыўындағы «Ашық байланыс» пенен жуўмағына жетти. Онда жаслар өзлериниң машқалалары, пикир ҳәм усыныслары менен бөлисти. Қыйнап атырған мәселелерине шешим табыў имканиятына ийе болды. Қулласы, күн даўамында өткерилген илажларда мәкан пуқаралар жыйынларындағы ҳәр бир жастың қызығыўшылығы итибарда болып, олар менен ислесиўдиң заманагөй механизми жаратылып атырғанлығынан дерек береди. Бул бүгин мәҳәлле жаслары алда ҳәм белсенди дегени.
Г.САПАРОВА,
арнаўлы хабаршымыз.
СҮЎРЕТЛЕРДЕ: илажлардан көринислер.
