ХАЛЫҚАРАЛЫҚ БИРГЕ ИСЛЕСИЎ НӘТИЙЖЕСИ
Жақында Әжинияз атындағы Нөкис мәмлекетлик педагогикалық институтында халықаралық бирге ислесиў мәселелерине арналған баспасөз конференциясы болып өтти.
Конференция қатнасыўшыларына Өзбекстан Республикасы Президенти администрациясы жанындағы Мәлимлеме ҳәм ғалаба коммуникациялар агентлиги ҳәм Қарақалпақстан Республикасы Министрлер Кеңеси тәрепинен тастыйықланған «Жаңа Өзбекстанның раўажланыў стратегиясы»нда белгиленген жети бағдар бойынша институттың халықаралық жоқары оқыў орынлары, илимий-изертлеў орайлары, сырт еллердиң мәмлекетимиздеги елшиханалары менен бирге ислесиў нәтийжелери, алдағы ўазыйпалар бойынша кең түрде мағлыўмат берилди.
Бүгинги күнде педагогикалық институтта халықаралық бирге ислесиў жумыслары шеңберинде дүньяның абырайлы жоқары оқыў орынлары, илимий-изертлеў орайлары менен 46 шәртнама ҳәм меморандумлар дүзилди. 2021-жылы июнь айында институт ректоры Б.Өтемуратов Россия Федерациясы Кубань мәмлекетлик университети ректоры М.Астапов пенен ушырасып, оқыў орынлары арасында бирге ислесиўди жолға қойды. Институтта рус тили бойынша сертификат беретуғын орай ашыў, оған Кубань мәмлекетлик университети профессор-оқытыўшыларын қатнастырыў, сондай-ақ, дефектология тәлим бағдары бойынша «2+2» системасы тийкарында қоспа бакалавриат тәлим бағдарламасын шөлкемлестириў, математикаға қәнигелестирилген институт жанындағы мектепте сол оқыў орны оқытыўшылары менен биргеликте оқыўшылардың билимин арттырыў, олимпиадаларға таярлаў, сабақлық, оқыў қолланбалар таярлаў мәселелери келисилди. Институттың 10 студенти илимий басшылары менен бирге Кубань мәмлекетлик университетинде әмелий курслардан өтти, еки магистрант 6 ай даўамында алмасыў бағдарламасы тийкарында билим ҳәм көнликпелерин арттырды.
Соның менен бирге, Сочи мәмлекетлик университети, Пакистан Ислам Республикасының Лаҳар қаласында жайласқан Пенжаб университети оқыў орынлары менен де тығыз байланыста билимлендириўдиң сапасын арттырыў бойынша жумыслар алып барылмақта. Әзербайжан Республикасындағы жоқары оқыў орынлары ҳәм илимий-изертлеў орайлары менен бирге ислесиў бойынша мәселелер қолға алынды. Сондай-ақ, институтта «Корея мүйеши» де өз жумысын баслады.
Өткен жылы еки тәреплеме бирге ислесиў жолға қойылған жоқары оқыў орынлары ҳәм илимий орайлардан 31 профессор оқытыўшылар студентлерге сабақ берди. Соның менен бирге, сырт елли студентлердиң де институтта оқыўы ушын жетерли шараятлар жаратылған. Ҳәзир институтта 25 сырт елли пуқара билим алып атыр. Ҳәзирги ўақытта АҚШ мәмлекетлик департаментиниң 2020-2022-жылларға белгиленген студентлерге инглис тилин «STEM» бағдары тийкарында оқытыў бағдарламасы бойынша 55 мың АҚШ доллары муғдарындағы грант жумыслары жолға қойылған, институт Өзбекстан Республикасы Президенти жанындағы Аралбойы халықаралық инновациясы орайы ҳәм UNICEF шөлкеми менен биргеликте социаллық инновацияларды қоллап-қуўатлаў бойынша «UP-Shift», Россия Федерациясының «Русский мир» фонды жойбарларының жеңимпазы есапланады.
Баспасөз конференциясына институт басшылары, ғалаба хабар қураллары ўәкиллери, блогерлер қатнасты, олардың усы бағдардағы сораўларына институт жуўапкерлери — проректорлар Рашид Ибадуллаев, Мырзамурат Жумамуратов, Қувондиқ Қодиров, Моятдин Жалеловлар жуўаплар берди.
Б.КАРАМАТДИНОВА.
