ЖУЎАПКЕР ХЫЗМЕТКЕРЛЕР ҚӘНИГЕЛИГИН АРТТЫРДЫ
Электр қурылмаларында жумыс ислеп атырғанда қәўипли ислеп шығарыў факторларының тәсирин сапластырыў бойынша шөлкемлестириў ҳәм техникалық илажларға әмел еткен ҳалда бахытсыз ҳәдийселердиң алдын алыў ҳәр бир энергетик хызметкердиң ўазыйпасы ҳәм миннети болып табылады.
Сонлықтанда, олардың қәнигелигин арттырыў ҳәм қайта таярлаў әҳмийетли илажлардан бири саналады.
Жақында, «Ўзэнергоинспекция» Қарақалпақстан Республикасы аймақлық бөлими, Инспекция баслығы тәрепинен тастыйықланған бағдарлама тийкарында физикалық ҳәм юридикалық шахслар объектлериниң электр хожалығы бойынша жуўапкер хызметкерлериниң қәнигелигин арттырыў ҳәм қайта таярлаў бойынша техникалық оқыў курслары шөлкемлестирилди.
Усы оқыў курсларын өткериўден тийкарғы мақсет — электр энергиясы тутыныўшылары электр қурылмаларын исенимли, қәўипсиз ҳәм нәтийжели эксплуатация етиўди тәмийинлеў ҳәм де оларды жумысқа жарамлы жағдайда сақлап турыў ушын электр-техник хызметкерлердиң қәнигелигин арттырыў ҳәм қайта таярлаў көзде тутылған.
Техникалық оқыўда электр-техник хызметкерлер актив қатнасып энергетика тараўына тийисли қағыйдалар ҳәм норматив ҳүжжетлер менен танысып, өзлерин қызықтырған сораўларына қәнигелер тәрепинен жуўаплар алды.
О.ЕРНАЗАРОВ,
«Ўзэнергоинспекция» Қарақалпақстан Республикасы аймақлық бөлиминиң бас қәнигеси.
