ХАЛҚЫМЫЗ ДАСТУРХАНЫ ТОЛЫ БОЛСЫН
Қыс басланып, писикшилик мәўсиминен қаншелли узақласқан болсақ та базарларымызда түрли мийўе ҳәм палыз өнимлериниң молшылығы көзимизди қуўандырады.
Бүгинги күнлери дийқан базарларымыз толысып, бул өнимлерге және де талап артып бармақта. Ҳақыйқатында да, Жаңа жылдың қәдем атыўына санаўлы күнлер қалған сайын базарларымыз адамлар менен гәўжим болмақта.
Пайтахтымыздағы «Нөкис дийқан базары» акционерлик жәмийети аймағында да аўыл хожалық ҳәм азық-аўқат өнимлериниң арзанластырылған Жаңа жыл ярмаркасы шөлкемлестирилмекте. Бул бағдарда халқымыз ушын барлық зәрүрли шараятлар жаратылған. Әсиресе, Бас прокуратура жанындағы департаменттиң Қарақалпақстан Республикасы басқармасы тәрепинен социаллық әҳмийетке ийе азық-аўқат өнимлерин арзан баҳаларда жеткерип бериў бағдарында нәтийжели жумыслар әмелге асырылмақта. Әне, усындай жумыслар көлеминде оннан аслам азық-аўқат ҳәм мийўе сақлаў қоймаханалары иске түсирилип, барлық дийқаншылық өнимлери сапалы ҳалында халқымызға жеткерилмекте.
Баҳаларға нәзер салатуғын болсақ, 1 кг картошка 3300-4000, пияз 2000-2500, гүриш 4000-6000, мал гөши 45000-50000, таўық гөши 21000 нан 25000, мәйек 900-1100 сумнан ҳәм бир қатар өнимлерди атап өтиўимизге болады.
— Ярмаркадағы барлық өнимлердиң арзанластырылғаны маған мақул болды, - дейди 69 жаслы Улығбек Юсупов. — Әсиресе, гөштиң баҳасы көтерилиңкиреп кеткен еди, бул жерде килосын 45000 сумнан сатып алдым. Бул баҳа мени жүдә қанаатландырды. Халықты ойлап бундай қолайлылықларды жаратып атырғанлардан миннетдармыз. Енди Жаңа жыл кешесин бала-шағамыз бенен көтериңки кейпиятта күтип алыў нийетиндемиз...
Әлбетте, Жаңа жыл дастурханының толы болыўы ушын байрам қарсаңында бул орында халықтың талабынан келип шығып, жаңа саўда орынлары да жаратылмақта. Журтласларымыз имканиятлардан үнемли пайдаланып, керекли өнимлерди сатып алмақта. Буннан базарларымыздағы қарыйдарларымыз да миннетдар.
— Биз базар администрациясы халқымыз бенен бирге болып, оларға қолайлылықлар жаратып атырмыз. Ярмаркамыздағы баҳалардың турақлылығын сақлаў мақсетинде жуўапкер қәнигелер тәрепинен ҳәр күни қадағаланып барылмақта. Өнимлердиң барлығы нақ пул ҳәм пластик карталар арқалы сатылмақта. Бул орында тийкарынан фермер хожалықларының арзанластырылған гөш өнимлери, «Nukus Dilisha» ЖШЖ, «Panamilk» сүт өнимлери фирмасы ҳәм басқа да бир қатар жәмийетлер өзлериниң өнимлерин халқымызға инам етип, базар тахталарын толтырмақта, - дейди «Нөкис дийқан базары» акционерлик жәмийети баслығының орынбасары Айшагүл Алламуратова.
Әлбетте, Жаңа жыл байрамы қарсаңында шөлкемлестирилип атырған бундай ярмаркалар халқымыздың молшылығын тәмийинлеў менен бирге, олардың бул өмирден разы болып жасаўына ҳәм Жаңа жылды жаңа нийетлер менен күтип алыўына хызмет етеди.
Г.САПАРОВА,
арнаўлы хабаршымыз.
СҮЎРЕТТЕ: ярмаркадан көринис.
Автордың түсирген сүўрети.
