ЖЕҢИМПАЗ ТӘРБИЯШЫЛАР ӨЗБЕКСТАН БАСҚЫШЫНА ЖОЛЛАМА АЛДЫ
Тақыятас районында Қарақалпақстан Республикасы Мектепке шекемги билимлендириў министрлиги тәрепинен «Жылдың ең жақсы тәрбияшысы-2021» таңлаўының республикалық басқышы өткерилди.
Оған қалалық ҳәм районлық басқышта жеңимпаз болған 80 нен аслам тәрбияшы өзлериниң педагогикалық жумысы, жәмийетлик турмыстағы жетискенлигин сәўлелендириўши видеоролик ҳәм оқыў – методикалық, илимий, руўхый-ағартыўшылық жумысларын көрсетиўши материаллары, халықаралық жойбарлар ҳаққындағы ҳүжжетлери менен қатнасты.
Таңлаў төрешилер тәрепинен баҳаланып барылды ҳәм жуўмағында «Ең жақсы методист тәрбияшы» номинациясы бойынша Қоңырат районындағы 9-санлы МШБШ тәрбияшысы Д.Сабурова, «Ең жақсы дөретиўши тәрбияшы» номинациясы бойынша Нөкис районындағы 10-санлы МШБШ тәрбияшысы Б.Ешмуханова, «Инновациялық ҳәм мәлимлеме технологияларын қоллана алатуғын ең жақсы тәрбияшы» номинациясы бойынша Қараөзек районындағы 7-санлы МШБШ тәрбияшысы Н.Бердиева, «Ең жақсы идея жаратыўшы» номинациясы бойынша Нөкис қаласындағы 27-санлы МШБШ тәрбияшысы А.Өтениязова, «Шебер қол устасы» номинациясы бойынша Әмиўдәрья районындағы 42-санлы МШБШ тәрбияшысы Ф.Оразматовалар жеңимпаз деп табылып, Өзбекстан Республикасы басқышына жоллама алды.
Жеңимпазлар шөлкемлестириўшилер тәрепинен мүнәсип сыйлықланды.
Т.СЕЙТНАЗАРОВА,
Қарақалпақстан хабар агентлигиниң шолыўшысы
