ТРЕНИНГ ҚАТНАСЫЎШЫЛАРЫ МЕНЕН УШЫРАСЫЎ
Қарақалпақстан Республикасы Жоқарғы Кеңесиниң Баслығы Мурат Камалов «Бизнес марафон» мотивациялық тренингиниң шөлкемлестириўшилери, исбилерменлер ҳәм бизнес тренерлер менен ушырасты.
Ушырасыўда Жоқарғы Кеңес Баслығы М.Камалов ҳүрметли Президентимиз тәрепинен мәмлекетимизде исбилерменликти раўажландырыў, әсиресе, бул тараўға жасларды кеңнен тартыў, олардың бәнтлигин тәмийинлеў, исбилерменликтиң жаңа, заманагөй, дүнья базарында өз орнына ийе, елимиздиң экономикалық потенциалын көтериў менен бирге халықаралық майдандағы имиджин арттырыўға хызмет ететуғын тармақларын ен жайдырыўға қаратылып атырған айрықша итибар өзиниң нәтийжелерин берип атырғанлығын атап өтип, бул бағдарда республикамызда әмелге асырылып атырған жумыслар ҳәм режелер ҳаққында мағлыўмат берди.
Өз гезегинде «Бизнес марафон» мотивациялық тренингиниң қатнасыўшылары жыллы жүзлилик пенен қабыл еткени ушын Қарақалпақстан Республикасы Жоқарғы Кеңесиниң Баслығына өз миннетдаршылығын билдирип өтти. Қарақалпақстанда соңғы жылларда социаллық-экономикалық тараўларын және де раўажландырыў, жасларды ҳәр тәреплеме қоллап-қуўатлаў бағдарында әмелге асырылып атырған жумысларға жоқары баҳа берди.
Өзбекстан Республикасы Президентиниң 2020-жыл 30-июнь күнги «Өзбекстан Республикасында жасларға байланыслы мәмлекетлик сиясатты түп-тийкарынан реформалаў ҳәм жаңа басқышқа алып шығыў илажлары ҳаққында»ғы Пәрманы тийкарында жасларды исбилерменликке тартыў арқалы оларда өзин-өзи раўажландырыў бойынша күшли мотивация оятыў мақсетинде халықаралық ҳәм жергиликли көлемде жоқары абырайға ийе ораторлар (жетекши исбилерменлер) қатнасыўында Республика бойлап «Бизнес марафон» мотивациялық тренинглери шөлкемлестирилмекте.
«Бизнес марафон»лар усы жылдың апрель-май айларында Наманган, Әндижан, Ферғана, Сырдәрья, Ташкент, Жиззақ, Наўайы, Бухара ўалаятларында өткерилип, бул илажларда 13 мыңнан артық жаслар қатнасты.
Бүгин пайтахтымызда өткерилетуғын «Бизнес марафон»да мотивациялық тренинглерди «Deli.uz», «Dekos.uz», «Mfaktor» жойбарлары тийкаршысы Ҳасан ҳәм Ҳусан Мамасаидовлар, «Asaxiy.uz» интернет дүкани тийкаршысы Феруз Аллаев, «Yaskanamu», «Alvon» текстил брендлери тийкаршысы Шерзод Бекназаров, «Thompson school» оқыў орайлары тармағы тийкаршысы Шахзод Баҳодиров, «Sobirovs Law Firm» (Канада) компаниясы тийкаршысы Раҳмад Собиров сыяқлы елимизде ҳәм сырт еллерде жетискенликлерге ерискен ўатанласларымыз, тәжирийбели исбилерменлер ҳәм бизнес тренерлер алып барады.Ушырасыўда келешекте бир қатар жойбарларды биргеликте әмелге асырыў бойынша өз-ара пикир алмасыўлар болды.
Қарақалпақстан Республикасы Жоқарғы Кеңесиниң баспасөз хызмети.
