ЖЕҢИМПАЗЛЫҚ БИР МЕКТЕПТЕН ЕКИ ОҚЫЎШЫҒА НЕСИП ЕТТИ
Жақында Қарақалпақстан Жазыўшылар аўқамында «Абдулла Арипов избасарлары» ҳәм «Уткир Ҳашимов шығармаларының билимданы» атамасындағы таңлаўлардың Қарақалпақстан Республикасы басқышы болып өтти.
Оған республикамыздағы улыўма орта билим бериў мектеплеринен 60 (соннан «Абдулла Арипов избасарлары» таңлаўына 44, «Уткир Ҳашимов шығармаларының билимданы» таңлаўына 18) оқыўшы қатнасты. «Абдулла Арипов избасарлары» таңлаўы 4 шәрттен ибарат болып, онда қатнасыўшылар шайырдың өмир жолы, дөретиўшилиги, оның кеминде үш қосығын ядтан айтып бериўи, шайыр ямаса нураныйлар ҳаққындағы қосықларды көркемлеп оқып бериўи керек. Ал, «Уткир Ҳашимов шығармаларының билимданы» таңлаўында болса, оқыўшылар жазыўшының өмир жолы, дөретиўшилиги, бир неше шығармаларының мазмунын айтып бериўи ҳәм шығармаларынан монолог оқып бериўи керек.
«Абдулла Арипов избасарлары» таңлаўына Қарақалпақстан Жазыўшылар аўқамының ағзалары Ә.Өтепбергенов, Б.Атамуратов, О.Сәтбаев ҳәм А.Дәрменовлар, ал, «Уткир Ҳашимов шығармаларының билимданы» таңлаўына болса, С.Жумағулов, М.Таўмуратов ҳәм А.Турекеевалар төрешилик етти.
«Абдулла Арипов избасарлары» ҳәм «Уткир Ҳашимов шығармаларының билимданы» таңлаўларының жуўмағында жеңимпазлық Нөкис қалалық ХББне қараслы 20-санлы улыўма орта билим бериў мектебиниң еки оқыўшысына несип етти. Атап айтқанда, усы мектептиң 10-класс оқыўшысы Индира Жолдасбаева (муғаллими Венера Тәжимуратова) «Абдулла Арипов избасарлары» таңлаўының, ал, усы мектептиң 8-класс оқыўшысы Дильфуза Оразалиева (муғаллими Захида Қутлымуратова) болса, «Уткир Ҳашимов шығармаларының билимданы» таңлаўының жеңимпазы болды.
Таңлаў жуўмағында жеңимпазлар Қарақалпақстан Жазыўшылар аўқамы тәрепинен I дәрежели диплом ҳәм әдебий китаплар менен сыйлықланып, усы таңлаўдың Ташкент қаласында болып өтетуғын жуўмақлаўшы Өзбекстан Республикасы басқышына жоллама алды. Сондай-ақ, таңлаўларға қатнасқан ҳәр бир оқыўшыға Қарақалпақстан Жазыўшылар аўқамы тәрепинен әдебий китаплар саўға етилди.
Сағынбай ОРАЗЫМБЕТОВ,
өз хабаршымыз.
Нөкис қаласы.
СҮЎРЕТЛЕРДЕ: таңлаў жеңимпазлары.
Автордың түсирген сүўретлери.
