ВЕТЕРАН СПОРТШЫЛАР ШӨЛКЕМИНИҢ МӘЖИЛИСИ
Бердақ атындағы Қарақалпақ мәмлекетлик университетинде Қарақалпақстан Республикасы «Veteran sportshi» мәмлекетлик емес коммерциялық емес шөлкеминиң мәжилиси болып өтти.
Республикамызда спортты раўажландырыўда мүнәсип үлеслерин қосқан ветеранларды ҳәр тәреплеме хошаметлеў, бүгинги күни арамызда жоқ спортшылардың естелигин мәңгилестириў, олардың ҳүрметине турнирлер өткериў айрықша әҳмийетке ийе. Бул бағдардағы жумысларды әмелге асырыў «Veteran sportshi» мәмлекетлик емес коммерциялық емес шөлкеминиң тийкарғы ўапзыйпаларынан бири болып табылады.
Илажда Өзбекстан Республикасына мийнети сиңген денетәрбиясы ҳәм спорт хызметкери, Қарақалпақстан Республикасына мийнети сиңген мәденият хызметкери Ю.Кулаков, республикамызға белгили палўанлар Ж.Мәмбетов, А.Сатаев, М.Каукишев, С.Сулайманов ҳәм басқалар шығып сөйлеп, өткен дәўир ишинде шөлкем тәрепинен бир қатар унамлы жумыслардың алып барылғанын атап өтти. Деген менен, ҳәзиргидей сынаўлы күнлерде бул жумысларды еле де жетилистириў талап етиледи.
Мәжилисте шөлкемлестириў мәселеси қаралды. Бүгинги күни Олимпиада ҳәм миллий спорт түрлери бойынша Нөкис жоқары шеберлик спорт мектебиниң инструктор-методисти болып ислеп киятырған Серик Жүсипбеков Қарақалпақстан Республикасы «Veteran sportshi» мәмлекетлик емес коммерциялық емес шөлкеминиң баслығы етип сайланды.
Қарақалпақстан хабар агентлиги
