ГИДРОПОНИКТЕ ТАЯРЛАНҒАН КӨКЖЕМ
Онлаған шаңарақ түтин түтетуғын «Ҳәким ата» АПЖ аймағындағы «Үшөзек» аўылы Қоңырат пенен Мойнақ районларының ортасы, «Таллық» каналы бойына жайласқан. Нафиса Байниязованың 2003-жылы өз атына ашқан көп тармақлы фермер хожалығы бийдай, овощ-палыз егинлерин егиў менен бир қатарда 2 гектарға мийўели бағ жаратады.
Шарўашылықты да баслы тараўға айландырып, жыл жуўмағын сап пайда менен жуўмақлағаны себепли аты ҳүрмет пенен тилге алынбақта.
Суўсызлық әламатларын басларымыздан кеширсек те истиң көзин билип ҳәрекет еткенимиз өз жемисин берип атыр. Ҳасыл туқымлы малларымыз бенен қой-ешкилеримиздиң бас саны көбейди. Нәсилли гисар қойлары менен падамыз жаңаланды, - дейди хожалық баслығы Нафиса Байниязова.
20l9-жылы меншиктиң басқа бир түри, шарўашылыққа негизленген «Әжинияз жайлаўлары» кооператив хожалығына айландық. 20 гектарға таза түбир жоңышқа егилди. 10 гектарлық сексеўилдиң нәлханасын шөлкемлестиргенимизди баслы утысымыз деп билемиз.
Инновациялық технологияны өндириске енгизиў ушын мәкан жайымызға тартылған электр қуўатлығын күшейтиў жоллары қарастырылды. Өз есабымыздан 109 миллион сумға 280 кВтлық электр линиясын 11,5 километр аралыққа тартып келдик.
Қыйын экологиялық ықлым шараятында жасап ҳәм мийнет етип атырғанымыз ушын мәмлекетлик емес коммерциялық емес ПРООН шөлкеминиң гидропоник қурылмасы, трактор, плуг, сеялка, шөп майдалайтуғын агрегатлар, жерди лазер усылында тегислейтуғын механизмлери гранттан утып алынды. Конвейер усылында ислейтуғын гидропоникте 80 килограмм бийдайды көгертсек, 500 килограмм ири от-шөплер, жоңышқа, жүўери, жүўери пақал, салы сабанларының унтағын араластырыў арқалы жуғымлы витаминлерге бай күнине 500 килограмм, айына 3,5-4 тонналық көкжемди ислеп шығарыў мүмкиншилигине ийе боламыз.
Гидропоникте овощ-палыз, басқа да егинлердиң нәллерин ерте шығарып, ашық майданға көшириў басланды. Көкжем менен ҳәзирше өзлеримиздиң талабымызды қанаатландырсақ, жақын айларда қоңсы хожалықларға да буйыртпа тийкарында жеткерип бериў ушын 100 тоннадан зыят салы сабаны, басқа да ири от-шөплер таярланды, - дейди хожалық баслығы Н.Байниязова.
Ө.ӨТЕЎЛИЕВ,
өз хабаршымыз.
Мойнақ районы.
