«АРАЛҒА ӨМИР БАҒЫШЛА!»
Хабарыңыз болса керек, Президентимиздиң 2020-жыл 23-сентябрь күни Бирлескен Миллетлер Шөлкеми Бас Ассамблеясының 75-юбилей сессиясында қатнасып, Арал теңизи ҳәм оның әтирапында әмелге асырылып атырған унамлы жумыслар туўралы айта келип, «Арал теңизи регионы экологиялық инновациялар ҳәм технологиялар аймағы» деп жәриялаў ҳәм БМШ Бас Ассамблеясының арнаўлы резолюциясын қабыллаўды, усы әҳмийетли ҳүжжет тастыйықланған сәнени болса, «Халықаралық экологиялық системаларды қорғаў ҳәм тиклеў күни» сыпатында усынысын ортаға қойғаны журтымыз пәраўанлығын көтериўге, региондағы экологиялық жағдайды жақсылаўда әҳмийетли болмақта.
Бүгинги күни Арал машқаласы тек ғана Өзбекстанда емес, ал, жәҳән итибарында болыўы, Арал регионында жасаўшы көплеген халықлардың келешегине болған үлкен дыққат-итибардың айқын көриниси.
Бүгинги күни Арал машқаласы ақыбетлерин жумсартыў бағдарындағы басламаларды қоллап-қуўатлаў ҳәм халықаралық шөлкемлер менен бирге ислесиўге кең жол ашылған. Усы мүнәсибет пенен «Аралға өмир бағышла!» атамасында Өзбекстан Республикасы Президенти администрациясы жанындағы мәлимлеме ҳәм ғалаба коммуникациялар агентлиги тәрепинен БМШтың Өзбекстандағы ўәкилханалары менен биргеликте шөлкемлестирилген онлайн конференция өткерилди. Тийкарынан қоршаған орталықты тиклеў тараўындағы инновациялық қураллар ҳәм механизмлерди ислеп шығыў ҳәм турмысқа енгизиўге бағдарланған бул конференцияда дүньяның бир қатар шөлкемлери, жергиликли ҳәм сырт ел ғалаба хабар қураллары ўәкиллери, эколог ҳәм блогерлер қатнасты.
Карантин талапларына әмел еткен ҳалда ZOOM платформасы тийкарында өткерилген илажда Арал теңизи регионында денсаўлықты сақлаў машқалаларын сапластырыў механизмлери, жергиликли халықтың бәнтлигин тәмийинлеў ҳәм турмыс дәрежесин жақсылаў, сондай-ақ, экологиялық апатшылықтың тәсирлерин жумсартыў бойынша қосымша илажлар сыпатында регионда социаллық исбилерменликти раўажландырыў бойынша халықаралық тәжирийбени енгизиў перспективалары да додалаўда болды.
Әлбетте, Арал машқаласы бул бүгинги күнниң ең актуаль мәселеси. Бул конференцияның тийкарғы мақсети де сол, Арал теңизи қурыўы ақыбетлеринен пайда болған машқалаларды бирге ислесиўши шериклеслер менен биргеликте шешиў, жумсартыў ҳәм оған дүнья жүзиниң итибарын қаратыў болып, конференцияға бир қатар министрлик ҳәм шөлкемлер қатарында Өзбекстан Республикасы Президенти жанындағы Арал бойы халықаралық инновация орайы да тиккелей өзиниң басламасы менен қатнасып, орай тәрепинен әмелге асырылып атырған инновациялар, технологияларды сол жерде ен жайдырыў ҳәм солар қатары бизлер дүнья жүзинде болып атырған жаңалықлардан хабардар болып, биргеликте жумыс алып барыў бүгинги күнниң баслы ўазыйпасына айланбақта, - дейди Өзбекстан Республикасы Президенти жанындағы Арал бойы халықаралық инновация орайы лаборатория баслығы К.Идирисов.
Конференция даўамында жергиликли тийисли шөлкем басшылары, халықаралық шөлкемлердиң ўәкиллери бул бағдардағы әҳмийетли мәселелерди өзинде жәмлеген баянатлары менен қатнасты.
Айтып өтиў орынлы, Өзбекстан Республикасы Президенти Ш.Мирзиёевтиң БМШ Бас Ассамблеясының 75-сессиясында шығып сөйлеген сөзиндеF Арал бойы аймағы экологиялық апатшылық орайына айланды. Биз ҳәзирги жағдайды жақсылаў ушын бул жерде 2 миллион гектар жаңа өсимлик атызларын ҳәм тоғайлар жаратыў, топырақ қатламын қәлиплестириў бойынша үлкен жумысларды әмелге асырмақтамыз, деп атап өткениндей, Президентимиздиң пүткил дүнья жүзи халықлары итибарын тартқан бул үлкен әҳмийетке ийе усыныс ҳәм басламалары Арал бойы регионында, әлбетте, күтилген нәтийжени берери, экосистемалардың жақсыланыўына, сондай-ақ, халқымыздың саламатлығының беккемлениўине унамлы тәсирин тийгизери сөзсиз.
Бул конференцияның өткерилиўи Аралға және өмир бағышлаўда әмелий көринис болары анық.
Г.САПАРОВА,
арнаўлы хабаршымыз.
СҮЎРЕТТЕ: конференциядан көринис.
