КӨРКЕМ ӨНЕРИМИЗ КӨРКЕЙМЕКТЕ
Елимизде көркем өнерге айрықша итибар қаратылыўы нәтийжесинде көплеген талантлы жаслар жетилисип шықпақта. Бизиң Қарақалпақ журтында миллий бақсышылық ҳәм опера жөнелисиниң ғәрезсизлик жылларында өзгеше тәризде раўажланыўы нәтийжесинде халықаралық таңлаўлар жеңимпазлары көплеп табылып, елимиз мәденияты дүнья халықлары нәзерине түспекте.
Бәршемизге белгили, көркем өнердиң ең жетик формасы опера ҳәм балет жөнелиси есапланады. Бул жөнелисте дөретиўшилик етиў, өз елин дүньяға танытыў кемнен-кем инсанға ғана несип ететуғын бахыт. Себеби, опера машақатлы мийнет, беккем төзим, үлкен билим талап ететуғын жөнелис. Операда ҳеш қандай техникалар үйлеспейди, онда тек жанлы ҳаўаз бирлемши роль ойнайды. Бақсышылық тараўы да сондай. Дуўтар менен ширели ҳаўаз әҳмийетли. Бул музыкалық инструментти қолға алған бала әлбетте, Қарақалпақ халқының миллийнамаларын шертип үйренип қалмастан халқымыздың узақ тарийхы, мәденияты, әдебияты менен де жақыннан танысады. Көркем өнердиң бул еки жөнелисин таңлаған бала мәмлекетимизди дүнья аренасына алып шыға алады.
Миллий мәдениятымызға жан күйдирер екенбиз, биринши орында талантлы жасларды жақыннан қоллап-қуўатлаў зәрүрлиги бар еди. Усы зәрүрликти аңлаған ҳүрметли Журтбасшымыз Нөкис қаласында Опера ҳәм бақсышылық көркем өнерине қәнигелестирилген мектебин ашыў усынысын билдирген еди. Жақында елимизге сапары даўамында усы мектепти салтанатлы жағдайда ашып, Қарақалпақ көркем өнерине, Қарақалпақ жасларына үлкен исеним билдирди.
Қарақалпақстан Республикасында жылдан-жылға опера жөнелисинде халықаралық ареналарда сыйлы орынларды қолға киргизген жаслар саны көбеймекте. Бул Президентимиз Ш.Мирзиёевтиң жоқары итибар қаратыўының нәтийжеси деп билемен. Мениң усы мектептиң дөретиўшилик басшысы етип тайынланыўым маған еки есе жуўапкершилик жүкледи. Қуўанышлысы, тараў ўәкиллери ҳәм жаслар менен сәўбетлесиўде ҳәр бир районда усы мектептиң бөлимлерин ашыў, келешекте мектеп негизинде консерваторияның филиалын шөлкемлестиририў режесин билдирип, бәршеге үлкен қуўаныш бағышлады. Алдағы ўақытларда сырт еллерден опера жөнелисинде белгили болған, терең билим ҳәм тәжирийбеге ийе профессор-оқытыўшыларды шақырыў, шеберлик сабақларын шөлкемлестириў арқалы жасларымыз қәбилетин еле де асырыў, халықаралық таңлаўларға таярлаў киби үлкен ўазыйпаларымыз бар.
Бул мектепте тек ғана опера ҳәм бақсышылық өнери сырлары емес, қосымша тәризде Европа саз әсбапларын шертиў де үйретиледи. Сондай-ақ, халықаралық бақсышылық тараўының республикамызда өткерилиўиниң жобаластырылыўы да бул тараўдың өзгеше пәт пенен раўажланыўының айқын көриниси.
Усындай жаңаланыўлар, алға илгерилеўлер Ренессанс дәўириниң ҳәрекетлениўши күши десек болады. Өзбекстан Президенти мәмлекетимизде кең көлемли реформаларды әмелге асырыўда анық система болыўын ҳәм ҳәр бир ис илим-пән жетискенликлерине тийкарланыўын, миллий раўажланыўымызды инновациялық технологиялар, санлы экономикаға таянған ҳалда жедел жетилистириўдиң ең туўры жолларын көрсетип берди. Сол айтқандай, Қарақалпақ көркем өнер тараўы үшинши Ренессанс дәўириниң раўажланыўы ушын сәтли қәдем тасланды.
Жеңисбай ПИЯЗОВ,
Өзбекстан Республикасына хызмет көрсеткен артист.
