МИССИОНЕРЛЕРДИҢ ҲИЙЛЕСИНЕ АЛДАНБАҢ
Дин — миллий мәнаўияттың қурамлық бөлими болып, ол миллетти бирлестирип турыўшы әҳмийетли факторлардан бири есапланады. Миссионерлик дин менен байланыслы ҳалда қәлиплескен ҳәм фанатизмге тийкарланған ҳәдийсе.
Бүгинги күнде миссионерлер жаслар кең пайдаланып атырған заманагөй техника ҳәм технология, ғалаба хабар ҳәм коммуникация қуралларының имканиятларынан да нәтийжели пайдаланбақта. Түрли мәмлекет ҳәм регионларда ҳәрекет етип атырған миссионерлер интернет тармағы арқалы өз жумысларын муўапықластырып атырғаны, финанслық қәрежетлерди биймәлел бир мәмлекеттен екиншисине өткерип атырғаны да усындай жуўмақ шығарыў ушын тийкар болады.
Ең дәслеп, заманагөй миссионерликке тән өзгешеликлер бундай ҳәрекетлерди республикамызда әмелге асырыўға умтылып атырған шөлкемлерге де анаў яки мынаў дәрежеде тән екенлигин атап өтиў лазым.
Соның менен бирге, мәмлекетимиздеги турақлы социаллық-экономикалық жағдай, күшли ҳәм системалы социаллық қорғаў сиясаты, миллий идея концепциясының ислеп шығылғаны ҳәм оған тийкарланған ҳалда алып барылып атырған идеялық-тәрбиялық ҳәм руўхый-ағартыўшылық үгит-нәсият жумыслары, халқымыздың өз исенимине беккемлиги жаўызлыққа қарсы ағартыўшылық пенен гүрестиң дәлили болмақта.
Миссионерлер тийкарғы итибарын аралас миллет ўәкиллеринен ибарат шаңарақлардың перзентлерине, ҳеш бир динге исенбеген, аўыр кеселликке, жоқшылыққа, материаллық қыйыншылықларға дуўшар болған, дүзетиў мәкемелеринен шығып келген, яғный материаллық ҳәм мәнаўий жәрдемге мүтәж адамларға, белгили бир жумыс түри менен бәнт болмаған жасларға қаратпақта. Тилекке қарсы, бундай үгит-нәсиятқа ерип атырған пуқаралар, олар арасында жаслардың да бар екенлигин атап өтиў лазым.
Бүгинги глобалласыў дәўиринде өзлигимизди, миллийлигимизди қәстерлеп-сақлаў, диний қәдириятларға садықлық туйғысын өсип киятырған жас әўладтың санасына сиңдириў, ата-бабаларымыз қалдырған бийбаҳа мийрасты терең үйрениў ҳәм кең үгит-нәсиятлаў — ҳәр биримиздиң муқаддес инсаный миннетимиз болып табылады. Солай екен, биз жаслар халқымыздың ертеңги күни, айдын келешеги, жәмийетимиздиң ҳәм ўатанымыздың тәғдирине жуўапкер екенимизди умытпаўымыз, өз билим ҳәм көнликпелеримизди ел-журт мәплери, оның бирлиги ҳәм раўажланыўы жолында сарплаўымыз тийис.
Шахноза ТОЛЫБАЕВА,
Нөкис қаласы.
