ӨРТ БИЙПӘРЎАЛЫҚТЫ КЕШИРМЕЙДИ
Қыс мәўсиминиң қәҳәрин шашатуғын аязлы күнлери басланыўынан өрттиң келип шығыўы жийи-жийи ушырасып туратуғыны үйреншикли әдет.
Әсиресе, газ ийиси адамлардың өмирине көбирек қәўип туўдырады. Сонлықтан да, буннан абайлы болғанымыз мақул.
Нөкис қаласы аймағында пуқаралардың турақ жайларында ушырасатуғын кемшиликлердиң бири бул көп қабатлы турақ жайларда орнатылған ысытыў қазанларының морыларын шамаллатыў каналларына жалғап қойыўларынан, газ плиталарына резина шлангаларынан пайдаланыўынан өрт жүз бериўи келип шықпақта. Сондай-ақ, айырым пуқаралар өз үйлеринде жанар май өнимлерин сақлаўы ҳәм де жас балаларды қараўсыз қалдырыўы ақыбетинен пайда болып атырғаны сыр емес. Мине, усындай бийпәрўалықтың нәтийжесинде Нөкис қаласы аймағында 2018-жылдың 10 айы даўамында 107 жағдайда өрт жүз берген болса, ал, быйылғы жылдың өткен 10 айында 91 өрт жүз берди. Көрип турғаныңыздай, өткен жылға салыстырғанда, быйыл өртлер саны 16 ға кемейген. Буның арқасында Нөкис қалалық Өрт қәўипсизлиги бөлиминиң жуўапкерли хызметкерлери тәрепинен пуқараларға үгит-нәсият, түсиндириў жумысларын жүргизиўинде деп билемиз. Сонлықтан да, усы күнлери бөлимимиз хызметкерлери қаламыз аймағында жайласқан саўда орынлары, жеке меншик турақ жайлар, мәкеме, кәрхана-шөлкемлер ҳәм мәкан пуқаралар жыйынларында ийис газинен абайлы болыў кереклиги туўралы үгит-нәсият жумысларын алып бармақта.
Қ.СЕЙТНАЗАРОВ,
Нөкис қалалық ӨҚБ инспекторы, лейтенант.
