ИМПОРТТЫ ОПТИМАЛЛАСТЫРЫЎ ҲӘМ ЭКСПОРТТЫ ХОШАМЕТЛЕЎ ЭКОНОМИКА ТУРАҚЛЫЛЫҒЫНЫҢ ТИЙКАРЫ
Бүгинги күнде мәмлекетимиз экономикасын турақластырыў бойынша зәрүр реформалар әмелге асырылмақта. Бәсекиге турақлы өнимлер ислеп шығарыў ҳәм де оларды экспортқа жибериў ушын зәрүр шараят ҳәм имканиятлар жаратылмақта.
Мәмлекетимиз басшысы тәрепинен экспортты көбейтиў ҳәм импортты қысқартыў бойынша қойылған ўазыйпалар орынланыўы бойынша Қарақалпақстан Республикасында системалы ислер әмелге асырылмақта.
Атап айтқанда, Республикамыз аймағына көп муғдарда импорт етилип атырған айырым түрдеги өнимлерди өзимизде ислеп шығарыў илажларын көриў ҳәм бул тараўда пайда болған тосықлар, жүзеге келип атырған машқалалар ҳәм де усынысларды қәлиплестириў бойынша Өзбекстан Республикасы Президенти жанындағы Исбилерменлик субъектлериниң ҳуқықлары ҳәм нызамлы мәплерин қорғаў бойынша ўәкил аппаратының Қарақалпақстан Республикасында хызмет көрсетиўши хызметкерлери, Қарақалпақстан Республикасы Министрлер Кеңеси, Инвестиция ҳәм сыртқы саўда министрлиги, Экономика ҳәм санаат министрлиги, Орайлық банктиң Қарақалпақстан Республикасы бас басқармасы, Мәмлекетлик салық ҳәм бажыхана басқармалары жуўаплы хызметкерлеринен ибарат исши топар дүзилген.
Исши топар тәрепинен Қарақалпақстан Республикасында исбилерменлик хызмети менен шуғылланыўшы исбилерменлик субъектлери, сол қатарда ислеп шығарыўшы ҳәм импорт етиўши кәрханалар баслықлары менен турақлы рәўиште ушырасыўлар өткерилмекте.
Нәўбеттеги усы темада өткерилген ушырасыўларда 10 ислеп шығарыўшы исбилерменлерге импорт орнын басыўшы өнимлер көлеми, сапасы ҳәм бәсекиге турақлылығын асырыў, көп импорт етилип атырған товарларды мәмлекетимизде ислеп шығарыў бойынша олардың алдағы хызметинде зәрүр болған әмелий усыныслар берилди.
Соның менен бирге, импортты әмелге асырыўшы 12 исбилерменлер менен ушырасыўлар өткерилип, сырттан импорт етилген товарларды мәмлекетимизде ислеп шығарыў хызметин жолға қойыў, оларды әмелге асырыў бойынша тийисли усыныслар берилди ҳәм олардың усыныслары тыңланды.
Өткерилген ушырасыўларда Республикамызға әсиресе, азық-аўқат өнимлеринен май, сүт, сыр ҳәм макорон өнимлери ҳәм азық-аўқат емес өнимлеринен музлатқыш, суўытқыш, кир жуўыў машиналары, жуўыў ҳәм тазалаў қураллары импорт етип атырғанлығынан келип шығып, усы тараўларда хызмет көрсетиўши исбилерменлерге жергиликли ислеп шығарыўды раўажландырыў бойынша анық жойбарларды әмелге асырыўға ҳәр тәреплеме көмек берилиўи белгиленди.
Исбилерменлик субъектлери менен өткерилген ушырасыўлар даўамында кәрханалар баслықларына жергиликли ислеп шығарыў көлемлерин көбейтиў, өнимлер түрлерин ҳәм кооперацион байланысларды кеңейтиў, өнимлер, товарлар ҳәм хызметлер импортын оптималластырыў бойынша түсиниклер берилип, машқалалары тыңланды ҳәм олардың айырымлары исши топар ҳәм тийисли мәкемелер менен биргеликте орынларда шешилиўи тәмийинленбекте.
А.КАМАЛОВ,
Өзбекстан Республикасы Президенти жанындағы Исбилерменлик
субъектлериниң ҳуқықлары ҳәм нызамлы мәплерин қорғаў бойынша ўәкил администрациясының
Қарақалпақстан Республикасында хызмет көрсетиўши жетекши инспекторы.
