ШАХМАТШЫЛАРЫМЫЗ 1-ОРЫНҒА КӨТЕРИЛДИ
7-август күни Ҳиндстанныӊ Ченнай қаласында өткерилип атырған пүткил жер жүзилик шахмат Олимпиадасында 9-тур ойынлары болып өтти.
Онда табыслы қатнасып киятырған Өзбекстан сайланды командасыныӊ жигитлери жәҳәндеги еӊ күшли командалардан есапланған Армения сайланды командасы ағзалары менен өз-ара ушырасты.
Қызықлы болып өткен бул ойынлар жуўмағында командамыз шахматшылары 3-1 есабында жеӊиске ерисиўге миясар болды.
Атап айтатуғын болсақ, командамыз ағзаларынан Жавоҳир Синдаров ҳәм Жаҳонгир Воҳидовлар өз қарсыласларын жеӊип шыққан болса, Нодирбек Абдусатторов ҳәм Нодирбек Якуббаевлар теӊбе-теӊ ойнап, бир упайды қолға киргизди.
Ал, қызларымыз болса, бул турда Израил сайланды командасы шахматшыларына 1,5-2,5 есабында утылып қалды.
Солай етип 9-турдан соӊ Өзбекстан сайланды командасы жигитлери өз упайларын санын 16 ға жеткерип, 1-орынға көтерилип алды.
Адилбай Оразов,
Қарақалпақстан хабар агентлиги шолыўшысы
