НУРАНИЙЛАРҒА АЙРЫҚША ҲҮРМЕТ ҲӘМ ИЗЗЕТ
Нөкис қаласындағы «Султан сарай» ресторанында Өзбекстан Республикасы Мәҳәлле ҳәм нуранийларды қоллап-қуўатлаў министрлиги, Қарақалпақстан Республикасы Жоқарғы Кеңеси ҳәм Министрлер Кеңесиниң шөлкемлестириўинде «Нуранийларға ҳүрмет ҳәм иззет» атамасындағы ушырасыў кешеси болып өтти.
Пайтахтымыздағы пайызлы орынлардың бири болған бул майдан байрамдағыдай безетилген. Симфониялық оркестр сазлары астында республикамызда түрли тараўларда жемисли мийнет етип, өзлериниң пидәкерлик мийнет менен халқымызға өрнек болып киятырған нуранийлар келешегинен үмит күттиретуғын жаслар тәрепинен салтанатлы жағдайда күтип алынды. Қатнасыўшылар дәслеп республикамызда ҳәрекет етип турған миллий-мәдений орайлар тәрепинен тигилген қара үйлер, түрли миллет ўәкиллери тәрепинен таярланған буйымлар, қол өнери үлгилериниң көргизбеси менен жақыннан танысты.
Жақында ғана елимизде Халықлар дослығы күни кең түрде белгиленди. Мәмлекетимизде миллетлераралық дослық ҳәм татыўлықты, түрли миллет ҳәм халық ўәкиллери арасында өз-ара аўызбиршилик, кеңпейиллик, мийрим-шәпәәт орталығын беккемлеў, миллий мәдениятлар, үрп-әдет ҳәм дәтүрлерди сақлаў және раўажландырыўға қосқан мүнәсип үлеси ушын бир топар белсендилер Президентимиздиң пәрманы менен орден ҳәм медальлар менен сыйлықланды. Олардың арасында Қараөзек районындағы Қуралпа аўыл пуқаралар жыйынының баслығы Жаңабай Адилбаев та бар. Ол «Дўстлик» ордени менен сыйлықланды.
Ушырасыўда Өзбекстан Республикасы Президентиниң кеңесгөйи, Мәҳәлле ҳәм нуранийларды қоллап-қуўатлаў министри, сенатор Т.Худайбергенов шығып сөйлеп, ҳүрметли Президентимиз Ш.Мирзиёевтың басшылығында нуранийларға ҳәм кексе әўлад ўәкиллерине көрсетилип атырған айрықша итибар және ғамқорлыққа тоқтап өтти.
Атап өтилгениндей, ғәрезсиз елимизде кексе жастағы пуқараларды мәмлекет тәрепинен қоллап-қуўатлаў системасын жетилистириў, олардың елимиздиң жәмийетлик-сиясий турмысына белсене қатнасыўы ушын зәрүр шараятлар жаратыў, кексе әўладтың жәмийетте, шаңарақларда ҳәм мәҳәллелерде тынышлық-татыўлықты тәмийинлеў, сондай-ақ, жас әўладты халқымыздың көп әсирлик дәстүрлерин ҳүрмет етиў руўхында тәрбиялаў жумысындағы ролин арттырыў бағдарында кең көлемли илажлар әмелге асырылмақта. Өзбекстан ветеранларының жәмийетлик жумысын қоллап-қуўатлаў «Нураний» фонды Қәўендерлик Кеңесиниң қарары менен экономика ҳәм өндирис, илим, мәденият, билимлендириў, денсаўлықты сақлаў, ҳуқық ҳәм басқа да тараўлардағы көп жыллық ҳадал мийнети ушын республикамыздан бир топар нуранийлар I, II, III дәрежели «Меҳнат фахрийси» көкирек белгиси менен сыйлықланды.
Ушырасыўда «Меҳнат фахрийси» көкирек белгиси ҳәм оның гүўалығы өз ийелерине салтанатлы жағдайда тапсырылды.
Қатнасыўшыларға хызмети көпшиликке өрнек болған нуранийларымыздың өмир ҳәм мийнет жолына бағышланған фильмлер көрсетилди. Дәстурхан әтирапында кексе әўлад ўәкиллери менен жаслардың пикир алысыўлары болды.
-Елимизде түрли миллет ўәкиллери беккем аўызбиршиликте жасап келмекте,-дейди Қарақалпақстан Республикасы Мәҳәлле ҳәм нуранийларды қоллап-қуўатлаў министриниң орынбасары Турсынбай Абдижаппаров.-Бунда нуранийларымыздың өмир жолы, бай тәжирийбеси жасларымыз ушын өрнек болып келмекте. Республикамыздан бир топар нуранийлардың «Меҳнат фахрийси» көкирек белгиси менен сыйлықланыўы Президентимиздиң Қарақалпақстанның кең пейил халқына, соның ишиде нуранийларына көрсетилип атырған айрықша итибар ҳәм ғамқорлықтың әмелдеги көриниси болып табылады. Нуранийларымыз Жаңа Өзбекстанның буннан былай да гүллеп-раўажланыўына, халықларымыз арасындағы дослықты беккемлеўде, жасларымызды ҳәр тәреплеме тәрбиялаўда алдағы ўақытлары да өзлериниң баҳалы ақыл-кеңеслерин берип барыўдан жалықпайды.
Илажға Қарақалпақстан Республикасы Жоқарғы Кеңесиниң Баслығы М.Камалов, Министрлер Кеңесиниң Баслығы Қ.Сариев қатнасты.
Д.АБИБУЛЛАЕВ,
Қарақалпақстан хабар агентлигиниң шолыўшысы.
