НАЎАЙЫЛЫ ЖАСЛАР МОЙНАҚҚА КЕЛДИ
Ҳәммемизге белгили, Президентимиздиң басламасы менен 2021-жыл ноябрь айында «Жасыл мәкан» улыўма миллий жойбары жәрияланып, 200 миллион түп терек нәлин егиў режелестирилген еди. Оған муўапық, көплеген шөлкемлер, мәҳәллелер, улыўма кең жәмийетшилик бул саўаплы жумыста жанкүйерлик көрсетти. Быйыл бәҳәр мәўсиминде 125 миллион терек нәллерин егиў мөлшерленбекте. Ал, усы жыл 1-марттан «Жасыл жыллық» улыўма миллий илажының басланатуғыны жәрияланды.
Усы жыл 11-март күни елимиз бойлап «Жасыл мәкан» жойбары шеңберинде өткерилип атырған усы «Жасыл жыллық» улыўмамиллий илажларында қатнасыў мақсетинде Мойнақ районына «Наўайы кән-металлургия комбинаты» акционерлик жәмийети, «Наўайыуран» мәмлекетлик кәрханасы, «НКМК фонды» мәмлекетлик мәкемеси ҳәм Наўайы мәмлекетлик кәншилик институтынан жәми 100ге шамалас ықтыярлы жаслар келип, районда үш күн даўамында экологиялық акциясы өткерилди.
НКМКның Жаслар жетекшилери Кеңесиниң басламасы менен шөлкемлестирилген усы акцияны өткериўден мақсет – «Жасыл жыллық» улыўмамиллий илажында белсене қатнасың!» сүрени астында Арал теңизиниң қурыған ултанында сексеўил нәллерин егиў арқалы «жасыл қапламалар» жаратылыўында өз үлесин қосыў, Мойнақтағы түпкиликли өзгерислер менен танысыў ҳәм жаслар менен пикир алысыў болып есапланады.
Өткерилген ушырасыўларда «Наўайы кән-металлургия комбинаты» акционерлик жәмийети туўралы мағлыўматлар берилди.
Атап өтилгениндей, комбинат дүньяда алтын өндириўши ири компаниялардың онлығына киреди. Комбинат жер асты байлықларының қорларын геологиялық излеў, қазып алыў ҳәм қайта ислеўден таяр өним алыўға шекемги болған өндирис процесслерин толық әмелге асыратуғын санаатлық кластер болып есапланады.
«НКМК» АЖ Өзбекстан кән-металлургия санаатының ең ири кәрханасы болып есапланып, оның өндирислик бөлимлери республикамыздың жети жеринде жайласқан. 2021-жылы комбинат дүньядағы алтын өндириўши компаниялардың рейтингинде 5-орынды ийеледи.
Өткен жылы комбинаттың республикадағы санаат өнимлерин ислеп шығарыўдағы үлеси 13 проценттен артық болып, мәмлекетлик бюджетке, жәми түсимлердиң үлеси 20 процентке шамаласты.
Бүгинги күнде «Наўайы кән-металлургия комбинаты» акционерлик жәмийетинде 46 мыңға шамалас адам жумыс ислемекте. Соның 13 мыңнан асламын жаслар қурайды.
Илаждың биринши күни даўамында «Жасыл жыллық» улыўмамиллий илажы қатнасыўшылары Арал теңизиниң Мойнақ районынан 70 километр қашықлықтағы қурыған ултанына барып, 30 мың түптен аслам сексеўил нәллерин отырғызды.
Екинши күни жергиликли белсенди жаслар менен бирге районда ушырасыў шөлкемлестирилди.
Мийманлар райондағы 1-, 2-, 3-, 4- ҳәм 8-санлы улыўма билим бериў мектеплерине барып, оқыўшы жаслар менен сәўбетлесиў өткерилди. Ол жерлерде акция шеңберинде «Наўайы кән-металлургия комбинаты» АЖ тәрепинен Мойнақ қаласындағы улыўма билим бериў мектеплерине 5 дана заманагөй компьютерлер топламы саўға етилди. Сондай-ақ, 12500 дана электрон китаплар ҳәм естелик саўғалар тапсырылды.
«Наўайы кән-металлургия комбинаты» акционерлик жәмийетиниң Жаслар жетекшилери Кеңесиниң белсендилери ҳәм райондағы билимли жаслар арасында «Заковат» интеллектуаллық ойыны өткерилди. Сондай-ақ, НКМК жаслары ҳәм Мойнақ районындағы спортқа қызығыўшы жаслар арасында спорттың волейбол түри бойынша жарыс өткерилди.
– Мен өзим Қарақалпақстанлыман. Бул жерге келиўди қәлеўши жаслар көп еди. Мойнақ районына сексеўил егиўге барамыз,-деп қәлеўшилерди сорағанында солардың арасынан бириншилерден болып акцияға қатнасыў тилегимди билдирдим,-дейди Наўайы мәмлекетлик кәншилик инстуты магистратура бағдары студенти Арысланбек Ниетбаев. – Мине, бүгин бизлер Наўайы мәмлекетлик кәншилик институты жәмәәти менен биргеликте Мойнақ районы аймағын және де раўажландырыў, көклемзарластырыў илажларына аз болса да өз үлесимизди қосыў мақсетинде Наўайы ўәлаятынан келдик. Бизлер жергиликли жаслар менен танысып, сәўбетлестик. Сексеўил нәллерин отырғыздық. Мен Мойнақты көргенимнен қуўанышлыман. Усындай ийгиликли ислерге бәрше пуқараларымызды белсене қатнасыўға шақырып қаламыз.
Илаж даўамында жаслар районның дыққатқа ылайық орынларына барып, Мойнақ районының тарийхы, соңғы жылларда әмелге асырылған жумыслар, жетискенликлер менен танысты.
Ә.Жиемуратов,
Қарақалпақстан хабар агентлиги
