ҚЫТАЙ КОМПАНИЯСЫНЫҢ ЎӘКИЛЛЕРИ ПИТКЕРИЎШИЛЕР МЕНЕН СӘЎБЕТЛЕСТИ
Бердақ атындағы Қарақалпақ мәмлекетлик университетинде Қытайдың жетекши «China Road and Bridge Corporation»қурылыс компаниясының ўәкиллери менен дөгерек сәўбети болып өтти.
Ушырасыўда жоқары оқыў орны менен жетекши қурылыс компаниясы арасында қәнигелер жетистирип бериў ҳәм илимий бирге ислесиў бойынша пикир алысыўлар болды.
Атап өтилгениндей, Президент Шавкат Мирзиёевтиң басшылығында 4-март күни болып өткен видеоселектор мәжилисинде жоқары оқыў орынлары студентлериниң бәнтлигин тәмийинлеў бойынша тийкарғы ўазыйпалар белгилеп берилген еди.
Қытайдың жетекши «China Road and Bridge Corporation»қурылыс компаниясы республикамыздың Үстүрт платосында жаңадан 120 километр жол қурылысында тендер жеңимпазы болып, жақын күнлерде жумыс баслайды. Дөгерек сәўбетинен гөзленген тийкарғы мақсет, усы жол қурылысына университет питкериўшилеринен қәнигелерди таңлап алыў болып табылады. Соның менен бирге, компания келешекте жоқары оқыў орны менен биргеликте илимий-изертлеў жумысларын алып барыўды өз алдына мақсет еткен. Бул бирге ислесиў жоқары оқыў орнын питкериўшилердиң бәнтлигин тәмийинлеўде айрықша әҳмийетке ийе болады.
Күнниң екинши ярымында компания ўәкиллери университеттиң питкериўши курс студентлери менен сәўбетлесиўлер алып барды.
Илажда «China Road and Bridge Corporation»қурылыс компаниясының менеджери Chang Sheng Jun, қәнигелер бөлиминиң баслығы Wang Chuang, университеттиң маркетинг ҳәм студентлер әмелияты бөлиминиң қәнигелери, Архитехтура факультетиниң профессор-оқытыўшылары, «қала қурылысы ҳәм хожалығы», «автомобиль жоллары ҳәм аэродромлар» бағдарларының питкериўши курс студентлери өз-ара пикир алысты.
Д.АБИБУЛЛАЕВ,
Қарақалпақстан хабар агентлигиниң шолыўшысы
