ҚМУ МАГИСТРАНТЫ — ХАЛЫҚАРАЛЫҚ ОЛИМПИАДА
ЖЕҢИМПАЗЫ
2021-жылдың 29-декабрь күни Россияның Красноярск қаласында «Педагогикалық портал» халықаралық орайы тәрепинен студентлер, магистрантлар ҳәм педагоглар арасында физика пәни бойынша онлайн олимпиада болып өткен еди.
Бул олимпиадаға Бердақ атындағы Қарақалпақ мәмлекетлик университети магистратура басқышы физика қәнигелигиниң 2-курс магистранты Гүлчеҳра Бекниязова да қатнасып, пән олимпиадасы комиссиясы ағзалары тәрепинен жеңимпаз деп табылып ҳәм шөлкемлестириўшилер тәрепинен алтын медаль, диплом ҳәм сертификатлар менен сыйлықланды.
Сондай-ақ, магистранттың илимий басшысы университеттиң «Ярым өткизгишлер физикасы» кафедрасы баслығы Қанатбай Абдирейимович Исмайыловқа да олимпиада шөлкемлестириўшилери тәрепинен арнаўлы диплом берилди.
Әдилбай Оразов,
Қарақалпақстан хабар агентлиги.
СҮЎРЕТТЕ: Гүлчеҳра Бекниязова.
