Еркин Қарақалпақстан Вести Каракалпакстана 23:46:14, 28.03.2024
Хош келипсиз! | RSS
Сайт мазмуны

Кириў усылы

МУҚАДДЕС ҚУРБАН ҲАЙЫТЫ ФОНДТЫҢ ҚАЙЫРЛЫ ИСЛЕРИ

Өзбекстан Республикасы Президентиниң усы жыл 2-август­тағы «Қурбан ҳайытын белгилеў ҳаққында»ғы қарарына муўапық, дүнья мусылманларының муқаддес байрамы болған бул сәне елимиздиң барлық орынларында көтериңки жағдайда белгилеп өтилди.

Бул күни мешит-медреселердиң әтираплары, қәбирстанлар ҳәм зыярат орынлары абаданластырылып, ҳәр қыйлы қайыр-сақаўатлылық илажлары әмелге асырылды.

Усындай ийгиликли илажлардан бири Өзбекстан Мусылманлары басқармасы жанындағы «Вақф» қайырқомлық жәмийетлик фонды тәрепинен шөлкемлестирилди.

Мағлыўмат орнында айтып өтетуғын болсақ, Өзбекстан Республикасы Президентиниң 2018-жыл 16-апрельдеги «Диний-ағартыўшылық тараў жумысларын түп-тийкарынан жетилистириў илажлары ҳаққында»ғы Пәрманына муўапық шөлкемлестирилген «Вақф» қайырқомлық-жәмийетлик фонды мешитлер ҳәм диний билимлендириў мәкемелериниң имаратларын қурыў, оңлаў, реконструкциялаў, оларда ислейтуғын профессор-оқытыўшылар, илимпазлар, қәнигелер ҳәм талаба-оқыўшыларды, сондай-ақ, халықтың социаллық қорғаўға мүтәж қатламларын ҳәм имканияты шекленген шахсларды материаллық ҳәм социаллық қоллап-қуўатлаў сыяқлы бир қатар ўазыйпаларды орынлаўды өзиниң алдына мақсет етип қойған.

Байрам күни пайтахтымыздағы Имам ийшан Мухаммед жомъе мешитинде усы фонд­тың қәўендерлигинде Нөкис қаласында жасайтуғын 60 шаңараққа мал гөши тарқатылды. Илаждан алдын мешиттиң имам-хатиби Б.Разов ҳәм «Вақф» қайырқомлық-жәмийетлик фонды Қарақалпақстан филиалы баслығының орынбасары И.Тажетдиновлар жыйналғанларды мүбәрек Қурбан ҳайыты менен қызған қутлықлап, бул байрамның халқымыз турмысында тут­қан орнына айрықша тоқтап өтти.

­ Президентимиздиң 2019-жыл 2-августтағы «Қурбан ҳайы­тын белгилеў ҳаққында»ғы қарары тийкарында Өзбекстан Мусылманлары басқармасы жанындағы «Вақф» қайырқомлық жәмийетлик фонды баслығының усы жыл 5-августтағы буйрығына муўапық, республикамыз бойлап 10 өгиз сойылды ҳәм кем тәмийинленген шаңарақлардың ағзалары менен имканияты шекленген шахсларға 3 килограммнан таза гөш байрам саўғасы ретинде тарқатылмақта, ­ дейди фондтың Қарақалпақстан филиалы баслығының орынбасары Ислам Тажетдинов. ­ Бүгинги илажға келиў мүмкиншилигине ийе болмаған пуқаралардың саўғаларын үйлерине апарып бериўди режелестиргенбиз...

Илаж соңында байрам саўғаларын алған пуқаралар бундай қайыр-сақаўатлылық ислерин шөлкемлестириўшилерге өзлериниң терең миннетдаршылықларын билдирди.

Бундай қайырқомлық илажлары республикамыздың барлық қала ҳәм районларында болып өтти.

С.ЖАНИЕВ,

арнаўлы хабаршымыз.

СҮЎРЕТТЕ: илаждан көринис.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF