ЖАҢА НЫЗАМДЫ ТҮСИНДИРИЎГЕ БАҒЫШЛАНДЫ
Жақында Қарақалпақстан Республикасы Әдиллик министрлигинде усы жыл 29-июль сәнесинде қабыл етилген «Қурал ҳаққында»ғы Өзбекстан Республикасы Нызамының мазмун әҳмийетин кең халық қатламына жеткериўге бағышланған баспасөз конференциясы болып өтти. Оған тараў ўәкиллери ҳәм ғалаба хабар қуралларының хызметкерлери қатнасты.
Илажда Қарақалпақстан Республикасы Әдиллик министрлигиниң ҳуқықый үгит-нәсият ҳәм ағартыўшылық бөлиминиң жетекши мәсләҳәтшиси Н.Қутлымуратова, Өзбекстан Республикасы Миллий гвардиясы Қарақалпақстан Республикасы қадағалаў-рухсат бериў жумысының бөлим баслығы Р.Жолдасовлар сөзге шығып, нызамның мақсети ҳәм ондағы белгилеп көрсетилген қураллардан пайдаланыў тәртиби ҳаққында айрықша тоқтап өтти.
Конференцияда атап өтилгениндей, қабыл етилген нызамның мақсети қурал ҳәм оның оқ-дәрилери айланысы менен байланыслы мүнәсибетлерди тәртипке салыў, пуқаралардың өмири, денсаўлығы ҳәм мал-мүлкин қорғаў, сондай-ақ, жәмийетлик қәўипсизликти тәмийинлеўге қаратылғанлығы менен әҳмийетли болып табылады.
Нызамның 5-статьясында қуралларды дүзилисине қарай пуқаралық, хызмет ҳәм жаўынгерлик қуралы етип үш түрге бөлип көрсетилген. Өз гезегинде пуқаралық қуралына аў қуралы, спорт қуралы, сондай-ақ, өзин-өзи қорғаўда газли қурал, электр энергиясынан пайдаланыўға тийкарланған қурылмалар өзин-өзи қорғаўға қаратылған қурал етип белгиленген.
Республикамыз аймағында пуқаралық ҳәм хызмет қуралы және олардың оқ-дәрилери айланысы үстинен қадағалаў миллий гвардия уйымлары тәрепинен әмелге асырылады, - дейди Өзбекстан Республикасы Миллий гвардиясы Қарақалпақстан Республикасы қадағалаў-рухсат бериў жумысы бөлиминиң баслығы Р.Жолдасов. Пуқаралардың аў қуралын пайдаланыў ушын рухсат алыў тәртибине келетуғын болсақ, Аңшылар жәмийети бирлеспесиниң усыныснамасы, медициналық тексериўден өткенлиги ҳаққындағы мағлыўмат ҳәм басқа да тийисли ҳүжжетлер толтырылғаннан соң миллий гвардияның қадағалаў-рухсат бериў жумысы бөлиминен дизимнен өткериледи. Соңынан сақлаў ҳәм алып жүриў ушын үш жыллық рухсатнама бериледи.
Пикирлесиў тәризинде болып өткен конференцияда журналистлер өзлерин қызықтырған сораўлар бойынша қәнигелерге мүрәжат етип, оларға тийисли жуўаплар алды.
А.ЮСУПОВ.
СҮЎРЕТТЕ: илаждан көринис.
