ТИЙИСЛИ ШАРАЛАР КӨРИЛМЕКТЕ
Соңғы жылларда мәмлекетимизде транспорт ҳәм транспорт коммуникациялары тараўын раўажландырыў, тасыўлардың жоқары дәрежедеги қәўипсизлигин тәмийинлеў, транспорт тараўындағы басқарыў тәртибин жетилистириў, тараў ушын тәжирийбели қәнийгелерди таярлаўға жөнелтирилген кең көлемли илажлар әмелге асырылып атыр.
Солардың бири Өзбекстан Республикасы Президентиниң 2019-жыл 1-февралдағы «Транспорт тараўында мәмлекетлик басқарыў тәртибин түптен жетилистириў ис-илажлары ҳаққында»ғы Пәрманы қабыл етилди. Пәрманда, Өзбекстан автомобиль транспорты агентлиги тийкарында Өзбекстан Республикасы Транспорт министрлигин шөлкемлестириў көрсетилип, оның ўазыйпасына министрликтиң автомобиль, темир жол, ҳаўа, дәрья транспортлары, метрополитен, сондай-ақ, жол хожалығын раўажландырыў тараўындағы жеке мәмлекет сиясатын ислеп шығыў ҳәм әмелге асырыў бойынша мәмлекетлик басқарыў уйымы есапланыўы;
министрлик тәрепинен өз ўәкиллик шеңберинде қабыл етилген қарарлардың орынланыўы мәмлекетлик басқарыў уйымлары ҳәм жергиликли мәмлекетлик ҳәкимияты уйымлары, басқа мәкемелер ҳәм олардың лаўазымлы шахслары, сондай-ақ, пуқаралар ушын мәжбүрий есапланыўы белгиленген.
Министрлик Өзбекстан автомобиль транспорты агентлигиниң барлық ҳуқықлары ҳәм миннетлемелери бойынша ҳуқықый мийрасқоры есапланады.
Өзбекстан Республикасы Министрлер Кабинетиниң 2017-жыл 25-апрельдеги 238-санлы «Халыққа транспорт хызметин көрсетиў қалалар ҳәм аўылларда автобусларда жолаўшылар тасыў системасын және де жетилистириў ис-илажларын әмелге асырыў ҳаққында»ғы қарарына муўапық, «Өзбекстан Республикасы ҳәкимшилик жуўапкершилик ҳаққында»ғы Кодексиниң 1461, 165, 1763, 1764 ҳәм 198 статьяларында көрсетилген автомобильлерде тасыўлар тараўында ҳуқықбузарлықлар ҳаққында баянламалар дүзиў, Қарақалпақстан Республикасы Транспорт министрлиги инспекторлары тәрепинен алып барылады. Министрликтиң Автомобиль тасыўлары қәўипсизлигин тәмийинлеў бойынша қадағалаў бөлими тәрепинен республика аймағында нызамсыз жолаўшы тасыў хызметин көрсетип атырған шахсларды анықлаў бойынша:
2017-жыл август-декабрь айы аралығында, 271 рейд жумыслары өткерилип, соннан 6 жүк тасыў бойынша, 701 жолаўшы тасыў бойынша, жәми 707 жағдай анықланған, соннан 701 шахс қарсысына топланған материаллар судқа шара көриў ушын өткерилген.
2018-жыл даўамында, 1558 рейд жумыслары өткерилип, соннан 218 жүк тасыў бойынша, 2737 жолаўшы тасыў бойынша, жәми 2965 жағдай анықланған, соннан 2886 шахс қарсысына топланған материаллар судқа өткерилип, 817.715.915 сум муғдарында жәрийма салынып, мәмлекетлик бюджетке өндирилген. Рейд тексериў ўақтында халыққа төлемли ҳүжжетсиз хызмет, яғный лицензиясыз хызмет көрсетип жүрген автотранспорт басқарыўшылар тәрепинен судқа шекем бир ай мүддет ишинде жәми 604 шахслар 161.743.541.2 сум бажы пулларын төлеп, лицензия карточкалары рәсмийлестирилип, 604 пуқара жумыс пенен тәмийинленген.
2019-жылдың 5 айлығы ишинде 788 рейд жумыслары өткерилип, соннан 182 жүк тасыў бойынша, 1125 жолаўшы тасыў бойынша, жәми 1307 жағдай анықланған, соннан 965 шахс қарсысына топланған материаллар судқа өткерилип, 342.378.801 сум муғдарында жәрийма салынып, мәмлекетлик бюджетке өндирилген. Рейд тексериў ўақтында халыққа төлемли ҳүжжетсиз хызмет, яғный лицензиясыз хызмет көрсетип жүрген автотранспорт басқарыўшылар тәрепинен судқа шекем бир ай мүддет ишинде жәми 518 шахслар 297.714.566.3 сум бажы пулларын төлеп, лицензия карточкалары рәсмийлестирилип, 604 пуқара жумыс пенен тәмийинленген. Бул бағдардағы жумыслар даўам етеди.
Т.Сарбаев,
Қарақалпақстан Республикасы Транспорт министри орынбасары.
