Еркин Қарақалпақстан Вести Каракалпакстана 02:57:11, 17.09.2019
Хош келипсиз! | RSS
Сайт мазмуны

Кириў усылы

ЛЕБИЗДЕН ТАБЫЛЫЎ — МӘРТЛИК

Гәпиниң арасында «Түни менен бетон қуйдық» деген участка баслығы Гүлмураттың қабағы уйқысызлықтан домбығып искенин абайладық.

­ Ўәде бердик пе, орынлаўымыз керек. Күн-айды айтпағанда, ҳәр бир минут, сааттан үнемли пайдаланыўға тырысамыз. Бизлердиң пайымызға «Түйемойын-Нөкис-Қоңырат» суў тармақларынан 1200 милли­метрлик трубада келип турған жеринде қурып атырған насос станциясындағы ҳәр бири 3 мың метркуб суў сы­йымлықтағы еки суў сақлағышты пайдаланыўға тапсырыў алдында турмыз.

Ени 24х27 метр, бийиклиги 4,8 сантиметрлик суў сақлағышлардың ултанларын бетонлап, қабырға дийўалларын тиклеў, үстин бастырыў жумыслары қызғын пәтлер менен жүргизилмекте. Саатына 113 метркуб суўды 90 атмосфералық басымда 450 миллиметрлик полиэтилен трубаларға көтерип беретуғын алты (екеўи аўысық) насослар станциясын қадағалаўшы блок посты менен қурылмақта. Бүгинги күнде бул объектте ҳәр бири бирнеше кәсип түрлерин жетик меңгерген жетписке жақын қурылысшы-монтажлаўшыларымыз үш мезгилге бөлинип, күн-түн демей жумыс ислейди,-дейди жуўапкершилиги шекленген «Қарақалпақ қурылыс материаллары» басқармасының участ­ка баслығы  Гүлмурат Шаниязов.

Ҳәрекеттеги «Карнекс» машинасына орнатылған механизмде 40 минутта 3 метркуб, күнине 75 метркуб сапалы бетон араласпасын таярлап бериўши Алланияз Әбдиразақовтың мийнетлери айрықша.

— 2007-жылдан берли кепсерлеўши болып ислеймен. Үстирт газ-химия ком­п­лексиниң қурылысынан соң усы жерге келдим,-дейди жоқары разрядлы кепсерлеўши Есбосын Нурабуллаев көтериңки руўх пенен.

Әлбетте, жумыслар усындай пуқта шөлкемлестирилип, қурылыс материаллары, басқа да керекли затлар толық жеткерилген, мийнет адамларына қолайлы турмыс шараятлары жаратылған жерде истиң өнимдарлы ҳәм сапалы болары сөзсиз.

КӨЗ ҚОРҚАҚ, ҚОЛ БАТЫР...

Егер, Мойнаққа жолаўшылап барар болсаңыз, магистрал асфальт жолдың гә оң, гә шеп жағына, тийисли мәнзиллерине шекем жайылған полиэтилен трубаларды бир-бирине жалғап, терең траншеялар қазып көмген, ҳәр 4 километр аралықтағысын күшли басым астында сынап көриўши қурылысшы-монтажлаўшыларды жийи ушыратасыз.

«Исти устасына тапсыр» дегендей, суў тармақларын өз мүмкиншиликлерине қарай 12-15 километр аралықтан бөлип алып ислеўши, жуўапкершилиги шекленген Қашқадәрьядағы нефьтегаз қурылыс басқармасының қурылысшы-монтажлаўшыларына гезлестик.

— Жигитлеримиз «Шортангаз», «Мубарекгаз» дей ең ири қурылыс майданшаларында мол тәжирийбелерин топлап, қәлеген жумыс түрлерин тапсырса болатуғын маманлардан,-дейди аға уста Рамшаддин Назаров.

— Бир аўылдың тусынан труба тартып өткенимизде, үйине қонаққа шақырған жасыүлкен бала гезинде Қоңырат пенен Мойнақтың арасынан жол таппай, қайыққа таяў басып барғанларын еследи...

Елимизде барлығы инсан мәплери ушын жаратылған. Президентимиз Ш.Мирзиёев жыл басында ирге тасын қалаған суў тармақлары қурылысын өз ўақтында питкерип, Мойнақ халқына ишимлик суўын жеткерип бергенимизди мақтаныш етемиз...

Ата-бабаларымыздың «Көз қорқақ, қол батыр» деген сөзлери ерксиз ядымызға түсти. Айтар аўызға жеңилдей болып көринген үлкен ис, жумыслар көлеминиң көплигине қарамастан өз мүддетинде тапсырыў алдында турғанымыз бийғәрез мәмлекетимиз қандай күш-қүдиретке ийе екенлигин аңлатады. Тәбият жарлыланып, теңиз жағысын таслап қашқан, дәрья суўы ҳәр жерден кесилгени менен газ-нефть кәнлерине бай  жағалаўларда ата қонысларына мәңги садық қалып, жасап ҳәм мийнет етип атырған мойнақшыларды ишимлик суўы менен толық қамтамасыз ететуғын күнлер жақын қалды...

Ө.ӨТЕЎЛИЕВ, өз хабаршымыз.

Мойнақ районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF