Еркин Қарақалпақстан Вести Каракалпакстана 05:33:48, 21.09.2018
Хош келипсиз! | RSS
Сайт мазмуны

Кириў усылы

ҚАЗАҚДӘРЬЯҒА ЕКИ ПАЯПЫЛ — КӨПИРЛЕР ҚУРЫЛДЫ

Әмиўдәрьяның теңизге қуярлығындағы «Байхожа»дан саға алатуғын Қазақ­дәрья бойлары бүгинги күнде сығасқан елат. Суў нәўпир жыллары арқадан самал ессе толқынларынан жәбир көргенлер «Жалтырбас» қолтығындағы мәкан жайлары, балық заводын таслай-таслай дәрьяны өрлеп, ҳәзирги орнына қоныс өзгертипти. Ҳеш ўақытта ултаны суўсыз болмайтуғын узынлығы 8 километрлик аралыққа жайласқан «Қазақдәрья» аўыл пуқаралар жыйыны аймағындағы 501 шаңарақта 5 мыңға жуўық турғынлары аўызбиршиликли жасап, халық хожалығының барлық тараўларында пидәкерли мийнет етеди.

Әлбетте, суўдың келиўин тилеген адамлар илажы бол­ғанынша еки жағысына жақын қонып, бозыққан жерлерине дийқаншылықларын ислеўшилер елеберин аў-қайық­ларынан пайдаланар екен. Гүзли-бәҳәр дәрьядағы суў қаймақласып қатса, сең ыққан, абыржы гезлери барыс-келислери қыйынласып, көпирден, 7-8 шақырымлық айланыш жолларынан жүриўге мәжбүр болысады. Әсиресе, ени 40-50 метр­лик дәрьяның арғы жүзине жайласқан улыўма билим беретуғын 14 ҳәм 15-санлы мектеплердиң 200 ге жуўық оқыўшысы «қол созым» жерге ҳәр күни дерлик 5-6 шақырымлық айланыш жоллардан барыўға мәжбүр еди. Ересеклердиң де емлеўхана, саўда шақапшалары, турмыс хызметин көрсетиўши орынлар менен той-мерекелерине барып келиўи мүшкил иске айланыпты.

— Ҳәр ҳәптениң төртинши күни, соңғы ўақытлары дәстүрге айланған орган хызметкерлери менен болатуғын ушырасыўда район прокуроры Жеңис Ермашев ҳәм профилактика инспекторы Нағмет Махамбетовлар менен болған ушырасыўда кеңесгөйимиз, нураный устаз Балтабай Султанов көптен унамлы шешими табылмай киятырған бул мәселени ортаға қойды. Халық дәртин тыңлап, жанкүйерлик пенен қатнас жасаған прокурор Ж.Ермашев биринши жумысын жағдайды жән-жақлама үйренип шығыўдан баслады. Мектеплердиң тусынан еки паяпыл-көпир салыўға нешше жүз мил­лионлық қаржы, техника ҳәм адам күшлери кереклиги есапқа алынды. Айтыл­ған сөз айтылған жерде қалмай, қыйын машқаланы бирлесип шешиў ушын ишки мүмкиншилик ҳәм имканиятлардан утымлы пайдаландық,-дейди «Қазақдәрья» аўыл пуқаралар жыйыны баслығы Бахытбай Керимбердиев Наўрыз байрам қабатында пайдаланыўға берилген паяпыл көпирлерден арман-берман кесип өткен мектеп оқыўшылары менен аўылласларынан көз алмай.

— Ертеде шығынды суўларды теңизге ағызыўшы коллекторға суў өлшеўши үскенелер орнатылған темир баспалдақлар кимлердиңдур ядына түсип, қум астынан ашып алынды. Ийе­лери, тийисли орынлар менен сөйлесиўлер жүргизилип, ел ийгилигине жумсаў ушын рухсат алынғаннан кейин алыс орынлардан жүк көтериў кранлары менен машиналарға жүклеп әкелдик. Темирлер бир-бирине қурастырылып, кепсерленди. «Бирлесип көтерген жүк жеңил» дегендей, аўылласларымыздан ҳеш бири өзлерин шетке алмай, қол көмеги ҳәм жәрдемлерин аямады. Еки жақта ҳәр күни дерлик отыз-отыздан қурылысшылар бригадасына бөлиниў менен жумыс иследик. Қыйыршық таслар, цемент, ултанын поллаў ушын ағаш, темирлерине бояў ҳәм басқа да керекли затлардың да рети болды. 17 күнде паяпыл-көпирлеримиздиң қурылысы техника қәўипсизлигин толық сақлаған ҳалда сапалы ҳәм муқыят болып питиўин тараў қәнигелери менен келген республика прокуроры Э.Тәжиев өз қадағалаўына алды.

Аўылласларымыз арасында ўақыт пенен санаспай жигерли мийнет еткенлерден Ж.Әбдихалиқов, Я.Бөкешов, С.Сагиев, Т.Әбдихалиқов, Т.Турымбетов, А.Сахиев, А.Байдуллаевлардың атларын ҳүрмет пенен тилге алғым келеди.

Ел хызметинде ҳәрқандай истиң аўыр-жеңили, үлкен-кишиси болмайды. Неше жыллардан берли сары уўа­йым, аўыр мүшкилге айлан­ған бул ис бир-биреўди түсинискен ҳалда бирлесип ис тутыўдан өз шешимин аңсат тапқанына қуўанасаң.

Ө.ӨТЕЎЛИЕВ,

өз хабаршымыз, Мойнақ районы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF