Еркин Қарақалпақстан Вести Каракалпакстана 18:27:53, 22.09.2019
Хош келипсиз! | RSS
Сайт мазмуны

Кириў усылы

ТЕХНОЛОГ ЖАСЛАРДЫҢ ЖЕТИСКЕНЛИКЛЕРИ

Мәмлекетимизде жаслар ушын билимлендириў, спорт, мәденият, хабар-коммуникация технологиялары ҳәм де басқа да тараўларда кең мүмкиншиликлер жаратылған болып, олардан орынлы пайдаланып атырған теңлеслеримиз көплеп жетискенликлерге ериспекте. Излениўшең, жаңалыққа жаны қумар жаслар жәмленген жоқары оқыў дәргайларынан бири Ташкент информациялық технологиялары университети Нөкис филиалы есапланады.

Ҳеш кимге сыр емес, заман бүгин жоқары интеллектуал потенциалға ийе хабар-технологияларын, шет тиллерин жетик дәрежеде билиўди талап етпекте. Жәҳәнде ең өтимли товар – инсан интеллекти саналады. Дүнья менен жүзлесиў ушын глобал тармақ саналған интернет системасын басқара билиў зәрүр.

«Аңсат емес бул майдан ишинде турмақ» деген пикир әйне интернетке байланыслы қолланылғандай түйиледи. Неге дегенде инсаният усы тармақ арқалы бирлести ҳәм усы тармақ арқалы дағдарысқа да ушыраўы мүмкин. Тийкарғысы, техника инсанды емес, инсан техниканы басқарса мақсетке муўапық. Сонлықтан жас әўладқа заманға сай тәлим-тәрбия бериў, олардың қызығыўшылықларын туўры жолға бағдарлаў ҳәм қоллап-қуўатлаў зәрүрлиги туўылмақта.  Усы мақсетте билимлендириў дәргайларында қәбилетли жасларды анықлаў, оларды хошаметлеў арқалы басқаларға ибрат етип көрсетиў ушын түрли таңлаўлар өткериў, мәмлекетлик стипендиялар шөлкемлестириў дәстүрге айланған. Президент, Ибн Сино, Наўайы, Беруний, Улуғбек, Бердақ, И.Юсупов киби стипендиялары қатары жоқары оқыў орынлары арасында ҳәр жылы Өзбекистан Республикасы Информациялық технологияларын ҳәм коммуникацияларын раўажландырыў министрлиги стипендиясы, Өзбекистан радиотехника, электроника ҳәм байланыс илимий-техника жәмийети стипендиясы, «Камолот» стипендиясы таңлаўлары өткерилип келинбекте.

Филиалымызда 5 студент өзлериниң бағдарламалары менен усы стипендияларға қатнасып, жақсы нәтийжелерге еристи. Олар арасынан Компьютер инжиниринги факультети студентлери М.Қувватова Өзбекистан Республикасы Информациялық технологияларын ҳәм коммуникацияларын раўажландырыў министрлиги стипендиясы, А.Орынбаева Өзбекистан радиотехника, электроника ҳәм байланыс илимий-техника жәмийети стипендиясын қолға киргизди. Ал, Н.Алламбергенов, Р.Базарбаев, А.Орынбаевалар «Камалат» стипендианты болыў бахтына еристи.

Устазлар исенимин ақлап, жақынларын шексиз қуўанышқа бөлеген бул жеңимпаз жаслардың келешегинен үлкен үмитлер күтемиз.

Саламат АВЕЗОВ,

Ташкент информациялық технологиялары

университети Нөкис филиалы

Оқыў жәрдемши бөлими лаборанты.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF