Еркин Қарақалпақстан Вести Каракалпакстана 15:59:00, 23.08.2019
Хош келипсиз! | RSS
Сайт мазмуны

Кириў усылы

ЖАҢА ЖУМЫС ОРЫНЛАРЫ КӨБЕЙМЕКТЕ

Елимизде халықтың бәнтлигин тәмийинлеў мәселеси ең әҳмийетли ўазыйпалардың бири сыпатында белгиленип, өткен жылы  бул бағдарда унамлы нәтийжелерге ерисилди. Өткен жылы республикамыз бойынша 49 мың 863 жаңа жумыс орынларын жаратыў белгиленип, бул бойынша режелер барлық бағдарларда, қала ҳәм район кесиминде толығы менен орынланды.

Атап айтқанда, санаатта 102,1, хызмет көрсетиў саласында 102, аўыл хожалығында 101, қурылыста 105, социаллық инфраструктура саласында 108,1, ислемей турған кәрханалардың жумысын тиклеў бо­йынша 103,6, коммерциялық банклердиң киши кәрхана ҳәм микрофирмаларды шөлкемлестириўи есабынан 102, жеке тәртиптеги исбилерменликти раўажландырыўда 104,3, жумысты үйге алып ислеў бағдарында 101,5, дийқан ҳәм фермер хожалықларын раўажландырыў бойынша 101,9 процентке орынланды.

2017-жылда халықтың бәнтлигин тәмийинлеў бо­йынша бағдарламаға муўапық 13 мың 286 пуқараның жаңадан шөлкемлестирилетуғын турақлы жумыс орынларында бәнтлиги тәмийинленеди. Бунда инвестициялық, жергилиликлестириў, аймақларды социаллық-экономикалық раўажландырыў бағдарламаларын әмелге асырыў есабынан жаңа жумыс орынлары жаратылады. Соның ишинде, санаатта 217 жойбар әмелге асырылып 4 мың 488 жаңа жумыс орны жаратылыўы белгиленбекте. Мәселен, Нөкис қаласындағы «НУКУС МЕД ТЕХ» жуўапкершилиги шекленген жәмийети тәрепинен улыўма нырқы 22,6 миллиард сумға тең болған медициналық шприцлер ҳәм инфузион системаларды ислеп шығарыў жойбары тийкарында 200, «Тот Холд» шаңарақ кәрханасы тәрепинен 150 миллион сумлық мийўе ҳәм овощ өнимлерин қайта ислеў жойбары бойынша 25, Қараөзек районындағы «TITAN CEMENT» жуўапкершилиги шекленген жәмийети қоспа кәрханасы тәрепинен улыўма ныр­қы 8,5 миллиард сумлық цемент ислеп шығарыў жойбарына муўапық 140, «Титан ДСЗ» жуўапкершилиги шекленген кәрханасында нырқы 200 миллион сумлық ҳәк ислеп шығарыўды шөлкем­лестириў өндирислик жойбары бо­йынша 110, Елликқала районындағы «Индустриал глобал техтил» ЖШЖ ийирилген жип ҳәм джинси гезлемесин ислеп шығарыў жойбары тийкарында 200, Беруний ра­йонындағы  «Жайхун дарё текстиль» ЖШЖ да ныр­қы 28,4 миллиард сумға тең болған пахтадан ийирилген жип өнимлерин ислеп шығарыў жойбарына муўапық 250 жаңа жумыс орны жаратылады.

Ал, хызмет көрсетиў ҳәм сервис тараўын раўажландырыў есабынан 2 мың 886 пуқараның бәнтлиги тәми­йинленеди.

Район ҳәм қала ҳәкимликлери тәрепинен жеңил конструкциялы қурылмалар тийкарында қурылатуғын хызмет көрсетиў объектлерин шөлкемлестириў ушын бос жатқан жер майданларын бериў өзиниң жақсы нәтийжесин бермекте. Соны инабатқа алып, 2017-жылда да исбилерменлерге киши көлемдеги жер майданларын ажыратыў ислери даўам еттириледи.

Аўыл хожалығы тараўында 545 жойбардың әмелге асырылыўы күтилип, онда тийкарынан көп тармақлы фермер хожалықларын раўажландырыў, аўыл хожалық өнимлерин жетис­тириў есабынан шарўашылықта 785, қусшылық тараўында 196, пал ҳәррешилигинде 97, балықшылықта 244 ҳәм басқа да бағдарларды шөлкемлестириў және раўажландырыў есабынан 411, қурылыс ҳәм инфраструктура жойбарларын әмелге асырыўда 3035, ислемей турған кәрханалардың жумысын тиклеў есабынан 1144 жаңа жумыс орны жаратылады.

Бағдарлама жойбарына муўапық, жеке тәртиптеги исбилерменликти раўажландырыў, олар тәрепинен мийнет шәртнамалары тийкарында қосымша хызметкерлерди жаллаў есабынан 2584 пуқараның бәнтлиги тәми­йинленеди.

Аўыл хожалығы, атап айтқанда, пахташылық, ғәллешилик, пиллешилик, аўыл хожалығы өнимлерин қайта ислеў, кептириў, жеке сектордағы турақ жайларды қурыў, сондай-ақ, жол қурылысы, социаллық ҳәм базар инфраструктурасы объект­лериндеги мәўсимлик және ўақтыншалық жумысларда жыллық орташа есапта 11828 адамның бәнтлиги тәмийинленеди.

Өнерментшилик, шаңарақлық исбилерменлик және жәрдемши дийқан хожалықлары менен қыйтақ жерлерде 22187 адам жумыс пенен тәми­йинленеди.

Бағдарлама шеңберинде киши бизнес ҳәм жеке исбилерменлик субъектлерине коммерциялық банк­лер тәрепинен 681,1 миллиард сумнан аслам қаржыны бағдарлаў белгиленип, бул көрсеткиш 2016-жылға салыстырғанда 30 процентке көп. Сондай-ақ, бағдарламаның әмелге асырылыўында билимлендириў мәкемелериниң питкериўшилерин жумыс­қа орналастырыўға айрықша итибар қаратыл­ған. Яғный, 29331 питкериўшини жумысқа орналастырыў режелестирилген.

Бәнтликке көмеклесиў орайлары тәрепинен 19299 пуқараны жаңа жумыс орынларына орналастырыўда тийисли жәрдемлер бериледи. Жумыссыз пуқаралар, колледж ҳәм жоқары оқыў орынларының питкериўшилери ушын 90 нан аслам мийнет ярмаркаларын шөлкемлестириў нәзерде тутылып отыр. Онда жас­лар­ға өз бизнесин баслаў ҳәм жумысқа орналасыў имканиятларына айрықша итибар қаратылады. Сондай-ақ, халықтың бәнтлик Бағдарламысының орынланыўын тәмийинлеў бойынша мониторинглер әмелге асырылады.

Қарақалпақстан хабар агентлиги.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF