Еркин Қарақалпақстан Вести Каракалпакстана 22:19:05, 22.09.2019
Хош келипсиз! | RSS
Сайт мазмуны

Кириў усылы

ҚАЛАЙ  МУҚАДДЕС ДЕМЕССЕҢ, АНА-ЎАТАНДЫ...

Бүгин тыныш ҳәм абат журтымызда атып атырған ҳәр бир таң өзгеше жаңаланыўларға, ийгиликли мақсет жолындағы жаратыўшылық ислерге толы болмақта. Әлбетте, мисли көрилмеген бул раўажланыўлар биринши гезекте ғәрезсизликти еле де беккемлеў жолындағы хал­қымыздың беккем аўызбиршилигиниң, келешекке үлкен исеним менен қолға-қол усласып мийнет етиўиниң арқасында екенлигин ҳәммемиз мойынлаймыз. Сонлықтан да, ғәрезсизлик күни елимизде ең уллы байрам сыпатында тән алынып, халқымыз ҳәр жылы жоқары кейпиятта, үлкен жетискенлик ҳәм табыслар менен байрамлаў ушын аўызбиршиликли түрде ат салысады.

Өткен ҳәптеде Ҳүрметли Президентимиз И.Ә.Кәримовтың «Өзбекистан Республикасы мәмлекетлик ғәрезсизлигиниң жигирма бес жыллық байрамына таярлық көриў ҳәм оны өткериў ҳаққында»ғы қарарын телевидение арқалы тыңлап ҳәм баспасөз бетлеринен оқығаннан кейин өзгеше толқынланыў сезимлери пайда болды. Әсиресе, «Гөззал ҳәм бийтәкирарымсаң, муқаддес Ўатаным, жаным саған пидә, Өзбекистаным» деген терең философия­лық мәни жәмленген баслы идеяны сүрен етиўи мәмлекет ғәрезсизлигиниң мазмун-әҳмийетин, ?атанның муқаддеслигин және де тереңирек сезиниўге ийтермелейди.

25 жыл. Айтар аўызға аңсат бол­ғаны менен халқымыз дәслепки қыйыншылықларға сабыр-төзимлилик пенен шыдады, келешекке үлкен исеним арттырып жасады ҳәм беккем аўызбиршилик пенен мийнет етип, ҳәр қандай қыйыншылықты пидайылық пенен жеңип өтти ҳәм бүгингидей абадан турмысты тәмийинлеўге еристи. Бул жылды инсан өмири менен өлшестирер болсақ, жигиттиң қайнап-пискен, әйне күш-қуўатына толысқан, алға қарай жигерли қәдем ататуғын жасы.

Ғәрезсизлигимиздиң дәслепки күнлеринен баслап-ақ узақты көре билген Ҳүрметли Журтбасшымыздың ақыллылық пенен алып бар­ған әдил сиясатының арқасындағы «терең ҳәм пуқта ойланған, белгили бес принципке тийкарланған, бүгинги күнде дүнья жүзинде «өзбек модели» деп тән алынған стратегия­лық раўажланыў бағдарламасының ислеп шығылғанлығы ҳәм ол избе-из әмелге асырылғанлығы тарийх бетлеринде өшпес из қалдыратуғынлығы тәбийғый», әлбетте.

Соңғы жыллары ғәрезсиз мәмлекетимиз экономикасы турақлы ҳәм жедел пәтлер менен раўажланып атырған еллердиң биринен саналатуғынлығын дүнья жәмийетшилиги мойынламақта. Елимиз экономикасының раўажланыўын жәҳән кең жәмийетшилигиниң тән алып атырғанлығының айқын мысалы сыпатында Жәҳән экономикалық форумы тәрепинен жәрияланған рейтинг­те соңғы үш жылда экономикасы тез раўажланып атырған мәмлекетлер арасында елимиз бесинши орынды ийелегенин, Бирлескен Миллетлер Шөлкеминиң жәрдеминде АҚШтың Колумбия университети әмелге асырған изертлеўлер тийкарында жәрияланған «Пүткил жер жүзилик бахыт индекси»нде Өзбекистан l58 елдиң арасында 44-орынды, бурынғы аўқамлас еллер арасында биринши орынды ийелеўи ҳәммемизде мақтаныш сезимлерин оятып, ғәрезсизликке сүйиспеншилигимизди және де арттырады. Сонлықтан да, бул журтты «гөззал ҳәм бийтәкирарымсаң» деп қайта-қайта жырлағың, көклерге көтерип мақтағың келеди.

Бир көз алдымызға келтирип көрейик, бурын әпиўайы бир велосипед ислеп шығарыў жолға қойылмаған елимизде ғәрезсизлик жылларында түрли маркадағы заманагөй жеңил ҳәм жүк тасыўшы автомобильлер, автобус ҳәм экскваторлар заводлары иске түсип, бул техникалардың  белгили бир бөлеги экс­порт­қа шығарылып атырғанлығы көпшилик еллерди таң қалдырмақта. Қала ҳәм аўылларымыздың келбети түп-тийкарынан жаңаланып, танып болмайтуғын дәрежеде өзгерип, күн сайын шырайланып бармақта. Өндирис ҳәм санаат жедел пәтлер менен раўажланып, жоқары технологияларға тийкарланған заманагөй кәрханалар иске қосылып, өндирис модернизация ҳәм диверсификацияланбақта, экономикамыздың бәсекиге шыдамлылығы артып, экспорт потенциялымыз жыл са­йын күшеймекте.

Әлбетте, бундай нәтийжелерге ерисиўде елимизде исбилерменлик субъектлери ушын ҳәр тәреплеме қолайлы орталық жаратылғанлығынан дәрек береди. Елимизде әмелге асырылып атырған реформаларға сырт елли инвесторлардың исеними барған сайын артып бармақта. Буған бир мысал, өткен жылдың 5-6-ноябрь күнлери ғәрезсиз мәмлекетимиз пайтахтында өткерилген «Халықаралық инвестициялық фо­рум»ға дүньяның раўажланған ee мәмлекетинен абырайлы фирма ҳәм компаниялардың 560 тан зыят ўәкиллери, жетекши халықаралық қаржы институтларының басшылары қатнасып, форум жуўмағы бо­йынша улыўма нырқы l2 миллиард доллардан зыят инвестициялық келисимлерге қол қойылғанлығы бирге ислесиўдиң еле де раўажланыўынан дәрек береди.

Еле ядымызда, l98l-жылы 8-класс­ты питкергенимизден кейин таңлаўға имканиятымыз болмағанлықтан район орайындағы кәсип-техникалық училищесинде мәжбүрий оқыдық. Сонда муғаллим ҳәм мастерларымыз «несип етсе, қурылысы басланып атырған имаратта питкерип шығасыз» дейтуғын еди. Қайда, бизлерден кейин де нешше дүркин жаслар оқыды. Қурылыслардың «толғағы» бирнешше жыллап аўыр кешетуғын еди. Бул қурылыс ғәрезсизликтен кейин ғана шынтлап қолға алынды ҳәм қысқа ўақыттың ишинде көп қабатлы заманагөй үлгиде питкерилип, «Қутанкөл» агроэкономикалық колледжи болып ашылды. Айтайын дегеним, бүгин биз Өзбекистанымызда қурылып атырған ең заманагөй, үлкен ҳәм теңи-тайы жоқ социаллық ҳәм санаат объектлери менен ҳәр тәреплеме көкирек керип мақтаныўға ҳақылымыз.

Усы орында соны айрықша мақтаныш пенен айтыўымыз тийис, Сүргил кәни негизинде нырқы 4 миллиард доллардан зыят болған Үстирт газ-химия комплексиниң Қубла Кореялы шериклеслер менен қурылып пайдаланыўға тапсырылыўы халқымыз ушын үлкен қуўанышлы жаңалық болды. Бул нефть-химия санаатында тек ғана елимизде емес, ғәрезсиз мәмлекетлердиң дослық аўқамы аймағында узақ мүддетли қаржыландырыў тийкарында турмысқа енгизилген дәслепки кең көлемли жойбар болып есапланады. Комплекс рәсмий ашылған күнге шекем дерлик l50 миллион долларлық 186 мың тоннадан зыят полиэтилен ҳәм полипропилен өними Орайлық ҳәм Шығыс Азия, ҒМДА ҳәм Европа еллерине жөнетилди. Мағлыўматларға сүйенер болсақ, 2020-жылға барып полиэтилен ислеп шығарыў көлеми төрт еседен зыятқа артып, өнимлердиң 90 проценти экспортқа шығарылып, жақын ўақытларда жылына бир миллиард доллар көлеминдеги өнимлерди сырт еллерге сатыўы елимиз санаатындағы, экономикасындағы бурын көрилмеген жетискенлик болып табылады.

Әзелден халқымыз шаңарақты муқаддес санап улығлап келген. Бирнеше мың, миллион шаңарақтың жыйындысы, бирлиги — Ўатан. Солай екен, күн сайын ҳәр тәреплеме раўажланып, қүдирети артып баратырған ғәрезсиз ел Өзбекистанды — қалайынша «муқаддессең Ўатаным» деп толқынланып, улығламассаң, ақыры?!

Ҳақыйқатында, бундай жаңаланыўларды, дөретиўшилик ислерди көрип ҳәм гүўасы болып қуўанар екенбиз, өткен дәўирдеги экономикалық жағдайларымыз, күн көрисимиз ядымызға түседи. Аўқам дәўиринде елимиз жан басына жалпы өним жетистириў бойынша аўқам республикалары ишинде он екинши орында болды. Халықтың жан басына миллий дәраматы аўқамлық көрсеткиштен еки есе, тутыныў товарларын ислеп шығарыў жан басына есаплағанда 2,5 есе аз болды. Әлбетте, бүгинги табысларымыздың негизинде ғәрезсизлик, мәмлекетимиз таңлаған демокра­тиялық жәмийет қурыўдың эволюциялық, басқышпа-басқыш раўажланыў жолы жатады.

Бул пикирлерге Президентимиз И.Кәримов өзиниң «Ана журтымыздың ығбалы ҳәм уллы келешеги жолында хызмет етиў — ең жоқары бахыт» атлы китабында анық ҳәм айқын мысаллар негизинде түсиник береди. Китаптың баслы орайлық идеясы Елбасшымыздың: «Биз кеше ким едик, бүгин ким болдықs» деген саўал тийкарында олардың мәнисин ҳәм әҳмийетин өзимиз терең көз алдымызға келтиремиз. Әйне ўақытта «Ертең ким болыўымыз, қандай жаңа шеклерди ийелеўимиз керекs» деген саўал туўралы тек ғана ойлап қоймастан, ал, әмелий ислеримиз бенен оған жуўап бериўимиз лазым» деген сөзлеринде өз көринисин таўып, ҳәммемизге үлкен жуўапкершилик жүклейди.

Қарарда ғәрезсиз мәмлекетимиздиң қүдиретиниң жыл сайын артып барыўы, абат журтымыздың раўажланыўы тийкарында ең уллы байлығымыз саналған тынышлық ҳәм татыўлықты көз қарашығындай сақлаў, миллетлераралық татыўлықты, аўызбиршиликти беккемлеўге, ҳәмийше қырағы ҳәм сергек болыўға айрықша әҳмийет қаратылған.

Ғәрезсизлик пенен теңлес жасларымыз шерек әсирге шығып атыр. Олар дүньяға келген жылдан баслап ғәрезсизлик руўхы, идеясы менен камалға келди. Бүгинлиги жаслар ушын жаратылған имканиятлардан пайдаланып, нәўқыран жаслық жигер менен ғәрезсизлигимизди беккемлеўге, терең қәдирине жетиўге ат салыспақта. Олар жәҳән шериклигинде жыл сайын абырайы артып атырған, усындай тыныш ҳәм абат журттың перзенти болғанынан жүдә бахтияр. Сонлықтан, халқымыз ана-Ўатан ушын «Жаным саған пидә, Өзбекистаным...» деп жар салыўға, керек болса, жанынан кешиўге бәрқулла таяр.

Қурбанбай БАЙНИЯЗОВ,

Бас редактор орынбасары.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF