Еркин Қарақалпақстан Вести Каракалпакстана 22:37:03, 22.09.2019
Хош келипсиз! | RSS
Сайт мазмуны

Кириў усылы

БАЙРАМҒА БАҒЫШЛАНДЫ

Соңғы жыллары спорттың теннис түри республикамызда жақсы раўажланып атырғанлығы, ғалабалығы менен кең ен жайып бармақта. Бүгинги күнде елимиздиң көплеген жаслары бул  спорт түри менен турақлы түрде шуғылланыў имканиятларына ийе болды.

1-2-июнь күнлери Әмиўдәрья ра­йоны 1-санлы академиялық лицейдиң ашық теннис кортларында «Саламат ана ҳәм бала жылы» ҳәм 1-июнь — «Халықаралық балаларды қорғаў күни»не бағышланып 2001-2002, 2003-2004, 2005 ҳәм оннан киши жыллары туўылған балалар ҳәм қызлар арасында ра­йон ашық бириншилиги өткерилди.

— Елимизде спортқа, әсиресе, балалар спортына болған дыққат-итибар өзиниң унамлы нәтийжелерин берип келмекте. Өткерилип атырған ашық бириншилик жарыслары жас ракетка усталарына тәжирийбе арттырыў мектеби болды десек қәтелеспеймиз. Себеби, республикамыздың барлық ра­йон ҳәм қалаларынан келген 70 тен аслам спортшы жаслар кортларда өз-ара беллесип, өзлериниң қай дәрежеде таярлықларға ийе екенлигин сыннан өткерди,-дейди Өзбекистан теннис федерациясы Қарақалпақстан Республикасы бөлиминиң атқарыўшы директоры Бахтыяр Елмуратов.

Еки күн даўам еткен жарыстың ашылыў кешесинде Қарақалпақстан Республикасы Жоқарғы Кеңеси Баслығының орынбасары А.Ҳамраев ҳәм район басшылары шығып сөйлеп, мәмлекетимизде спортқа, дене тәр­биясына қаратылып атырған итибар, елимиз жасларының жәҳән ареналарында қолға киргизип атырған табыслары жөнинде айтып өтти.

Жарыс жуўмағында 2001-2002-жыллары туўылған балалар арасында Ө.Бекниязов, қызлар арасында А.Қудайбергенова, 2003-2004-жыллары туўылған балалар арасында У.Айтбаев, қызлар арасында А.Жумабаева, 2005 ҳәм оннан киши жыллары туўылған балалар арасында А.Муратбаев, қызлар арасында Э.Тажекеевалар бириншиликти қолға киргизди ҳәм оларға шөлкемлестириўшилер тәрепинен диплом ҳәм баҳалы саўғалар тапсырылды.

Р.АРЗИЕВ.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF