Еркин Қарақалпақстан Вести Каракалпакстана 09:38:34, 21.08.2018
Хош келипсиз! | RSS
Сайт мазмуны

Кириў усылы

ТУРМЫСЫМЫЗДЫҢ  ТЫНЫШЛЫҒЫН ТӘМИЙИНЛЕЙИК

Быйыл халқымыз елимиз ғәрезсизлигиниң 25 жыллығын салтанатлы жағдайда белгилейди. Тарийхый көзқарастан қысқа, бирақ, оғада әҳмийетли болған бул дәўир ишинде республикамызда жаңадан-жаңа ҳәм үлкен табыслар, жетискенликлер қолға киргизилди.

 

Ең баслысы, халқымыз тыныш ҳәм пәраўан турмыс кеширмекте. Лекин, бүгинги күнде дүньяның айырым жерлеринде, әсиресе, Жақын Шығыста жүз берип атырған қанлы урысларды көрип, олардан дурыс жуўмақ шығарған ҳалда, ана-Ўатанымызды душпанлық нийеттеги ҳәр қандай сыртқы күшлерден сақлаўға бәрқулла таяр турыўымыз, тыныш, парахат турмысымыздың қәдирине жетип жасаўымыз кереклигин өмирдиң өзи көрсетип турыпты. Пуқараларымызды, әсиресе, жасларымызды ҳәр қыйлы жат идея­лар, «ғалаба мәденият» топылыс­ларынан сақлаў, олардың ең қәўиплиси болған диний экстремистлик идеялардан қорғаў бүгинги күнниң кешиктириўге болмайтуғын ўазыйпаларының бири болып қалмақта.

Мәмлекетимиз Президенти ­И.Кәримов 1993-жылда Бирлескен Миллетлер Шөлкеми минберинен турып, диний экстремизм ҳәм терроризм халық­аралық көлемде оғада тамыр жайып баратырғаны, оған қарсы кескин гүресиў кереклигин айтып өткен еди.  Бул пикирлер  елимиз ағза болған Шанхай бирге ислесиў шөлкеминиң ҳәр бир саммитинде де билдирилип киятыр.

Ҳә­зирги күнниң ең тийкарғы маш­қалаларының бири — диний исенимге қарсы болған ағымлардың республикамызға кирип келиўиниң алдын алыў, келешегимиз болған жас әўладты жәмийетимизге жат идея­лардан қорғаў болып табылады. XXI әсир обасы саналған терроризм ҳәм диний экстремизм қәўпин толық сапластырыў да әйне усы маш­қаланы шешиўге байланыслы.

Бүгинги күнде терроризм ҳәм диний экстремизм әллеқашан миллий, этникалық, диний түсиниклерден тысқарыға шығып, пүткил жәҳән көлеминдеги түсиникке айланды. Атап айтқанда, ҳәзирги күнде тек өз алдына шахс емес, ал, жынайый топар ҳәм нызамсыз шөлкемлер өзлериниң ғәрезли мақсетлери ҳәм сиясий, экономикалық, миллий, диний жеке машқалаларды шешиў ушын диний экстремистлик ҳәм терроршылық усылларды қолланбақта. Бул өз гезегинде мәмлекетимиздиң ҳуқық қорғаў уйымлары тәрепинен терроризм, диний экстремизм тамырына, мазмун-мағанасына айрықша итибар қаратыўды талап етеди.

Бул машқалаларды шешиў жәмийетимиздиң барлық ағзалары, әсиресе, ҳуқық қорғаў уйымлары хызметкерлериниң алдына да үлкен ўазыйпаларды қояды. Олардың қатарында бажыхана тараўының ўәкиллери де өз ўазыйпаларына терең жуўапкершилик пенен қарап келмекте. Хызметкерлеримиз республикамыз аймағына ҳәр қыйлы диний әдебиятлар, психотроп затлар ҳәм басқа да нызамсыз буйымлардың кирип келиўиниң алдын алыўда қырағылық пенен мийнет етпекте. Әлбетте, олар тынышлығымызды, халқымыз турмысының пәраўанлығын тәмийинлеўде өзлериниң хызметиниң айрықша әҳми­йетке ийе екенлигин терең түсинеди.

А.АБУТОВА,

«Нөкис-Аэропорт» бажыхана посты инспекторы,

бажыхана хызмети аға лейтенанты.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF