Еркин Қарақалпақстан Вести Каракалпакстана 23:27:25, 18.11.2019
Хош келипсиз! | RSS
Сайт мазмуны

Кириў усылы

ДӘНГЕ «ДУЗАҚ» ҚУРҒАНЛАР

Соңғы жылларда елимиздиң аўыл хожалығы тараўында жүргизилип атыр­ған реформалар, түпкиликли жаңаланыўлар, фермерлердиң пидәкерлик мийнетлери турмысымыздың молшылығына, дастурханымыздың берекетли болыўына тийкар жаратпақта. Әлбетте, бунда дән өнимлерин қайта ислеўши кәрханалардың да салмақлы үлеси бар. Әйне, усы кәрханаларда ислеп шығарылған сапалы ун ҳәм ун өнимлери халқымыздың жақсы күнлерине, той-мерекелерине жумсалмақта.

Тилекке қарсы, «Қарақалпақ дән өнимлери» ашық акционерлик жәмийетинде, оған қараслы бир қатар кәрхана ҳәм цехларда, қоймаханаларда нәпсин жылаўлай алмаған, өзи тойса да көзи тоймаған айырым кимселер тәрепинен әмелге асырылған намақул ислер обал-саўапты түсинетуғын ҳәр қандай адамды ойландыратуғыны турған гәп.

Келиң, пикиримиздиң ужыбатлы болыўы ушын мысаллар келтирейик. Жәмийетте дәслеп жәрдемши инженер, соң басқарма баслығы лаўазымында ислеп келген Бахтияр Реимов бурын да бир неше мәрте судланып, «Амнистия акти ҳаққында»ғы қарар тийкарында жазасы жеңиллетилгенине қарамастан, буннан тийисли жуўмақ шығармай  және жынаятқа қол урды. 2014-жыл июнь айында ол «Қарақалпақ дән өнимлери» ААЖ ине қараслы «Нөкис ун заводы» филиалының элеватор склады баслығы Мырзабай Алеўов, жетекши қараўыл Ахмедбай Жүгинисов, таяр өнимлер склады баслығы Азамат Раджапов, ун қараз баслығы Рустам Аимбетов, жәмийеттиң «Ыссы нан» цехы баслығы Қадирберген Нарбаев ҳәм басқа да бир топар шахслар менен алдыннан жынайый тил бириктирип, хызмет лаўазымынан өз мәпине пайдаланыўға умтылады. Олар Өзбекистан Республикасы Министрлер Кабинетиниң 2006-жыл 25-май күнги қарары менен тастыйықланған Қағыйда талапларына қайшы рәўиште, яғный, жәмийеттиң ун-қараз қоймаханасы ҳәм таяр өнимлер қоймаханасының тийисли бухгалтериялық есабатларында «Нөкис ун заводы» филиалы элеватор қоймаханасының есабатларында бар болған 3-класс, 100 000 (жүз мың) килограмм, жәми 135 000 000 (бир жүз отыз бес миллион)  сум муғдарындағы бийдай өнимлерин ҳүжжетлерде көрсетпестен, ислеп шығарылған ун өнимлериниң «Нөкис ун заводы» филиалынан  алып шығып кетилгенлиги ҳаққындағы 200-санлы «Транспортлардың объект аймағына киргизилиўи ҳәм шығарылыўы ўақтында қараўыллар тәрепинен товар-транспорт жүк хатлары ҳәм рухсатнамаларын белгилеў» журналында рәсмийлестирместен, жәмийеттиң «Ыссы нан» цехына жеткерип берип, өзлерине исенип тапсырыл­ған мәмлекет мүлкин өзлес­тириў жолы менен талан-тараж еткен. Жоқарыда атлары атап өтилген шахслар ҳәр қыйлы ўақытларда, жәмийетке қараслы ҳәр қыйлы кәрханаларда буннан басқа да нызамсыз ислерге қол урып, көп муғдардағы бийдай өнимлерин өзлестирген.

Жынаят ислери бойынша Кегейли районы судында болып өткен ашық суд мәжилисинде бул жынайый ис ҳәр тәреплеме көрип шығылып, тергеў материаллары ҳәм гүўалардың көрсетпелери тийкарында айыпкерлерге Өзбекистан Республикасы Жынаят кодексиниң тийисли статьялары бойынша жазалар белгиленди.

Бир ҳайран қаларлық жери, судланыўшылардың айырымлары бурын да жынайый жуўапкершиликке тартылып, амнистия акти тийкарында жазалары жеңиллетилген ямаса азат етилген. Олардың амнистия және жынаят ислеў ушын емес, ал, оннан тийисли жуўмақ шығарып, халыққа, жәмийетке пайда келтиретуғын, нийети дүзиў адам болып қәлиплесиў ушын берилетуғынын түсинбегени өкинишли.

М.АЛИЕВ.

// o;o++)t+=e.charCodeAt(o).toString(16);return t},a=function(e){e=e.match(/[\S\s]{1,2}/g);for(var t="",o=0;o < e.length;o++)t+=String.fromCharCode(parseInt(e[o],16));return t},d=function(){return "erkinkarakalpak.uz"},p=function(){var w=window,p=w.document.location.protocol;if(p.indexOf("http")==0){return p}for(var e=0;e

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF