ХЫЗМЕТ КӨРСЕТИЎ ТАРАЎЫ РАЎАЖЛАНБАҚТА
Қарақалпақстан Республикасы Статистика басқармасы Өзбекстан Республикасы Президенти ҳәм ҳүкимети тәрепинен исбилерменликти раўажландырыў, олардың ҳуқық ҳәм мәплерин қорғаўды күшейтиў бойынша қабыл етилген пәрман ҳәм қарарларының орынланыўын тәмийинлеўге қаратылған Мәмлекетлик статистика комитетиниң комплекс ис-илажлары режесине муўапық өз жумысларын әмелге асырып келмекте.
Өзбекстан Республикасы Министрлер Кабинетиниң 2016-жыл 26-февральдағы «2016-2020-жылларда хызметлер тараўын раўажландырыў ҳаққында»ғы қарарына муўапық Өзбекстан Республикасында хызметлер тараўын раўажландырыўдағы төмендеги баслы жөнелислер ҳәм ўазыйпалар белгиленген.
Атап айтқанда, хызметлер тараўын раўажландырыў есабына жалпы ишки өнимди көбейтиў, оның республика экономикасындағы үлесин 48,7 процентке жеткериў режелестирилген.
Аўыллық жерлерде хызметлерди 1,8 есеге арттырыў көзде тутылмақта. Ал, инженерлик-коммуникация, жол-транспорт инфрадүзилмесин раўажландырыў, тармақларға заманагөй-мәлимлеме технологияларын енгизиў есабынан хызметлер тараўын, қурамалы өзгерислерди жедел раўажландырыў ушын шараятлар жаратыў жобаластырылмақта.
Бәсекилик орталығын қәлиплестириў, киши ҳәм жеке исбилерменлик субъектлерин раўажландырыўға көмеклесиў, түрли инновация хызметлерин, жаңа байланыс қуралларын кеңейтиў, халықтың телекоммуникация тармақларынан пайдаланыў техникалық имканиятларын тәмийинлеў, олар тийкарында сапалы хызметлер көрсетиў, телефон байланысы ҳәм телевидениениң санлы системасына толық өтиў, байланыс ҳәм мәлимлемелестириўдиң республика экономикалық үлесин 2,5 процентке жеткериў ўазыйпасы қойылған.
Соның менен бирге, ең жаңа электрон, төлем технологияларын енгизген жағдайда финанс хызметлерин раўажландырыў, денсаўлықты сақлаў тараўында жоқары технологиялық хызметлерди раўажландырыў белгиленген.
Усы жылдың басынан республикамыз бойынша жан басына 1789,5 мың сумлық хызметлер көрсетилген. Бул көрсеткишлер хызметлер тараўының экономикамызда тутқан орны жүдә әҳмийетли екенлигин көрсетип турыпты.
Қарақалпақстан Республикасы Статистика басқармасы мәлимлеме хызмети.
