ДИНДИ НЫҚАП ЕТКЕНЛЕР
ОЛАРДЫҢ ЖАЛҒАН ИДЕЯЛАРЫНА АЛДАНЫП ҚАЛМАЙЫҚ
Әзелден дин инсанлар өмиринде айрықша әҳмийетли орын ийелеп, инсаныйлық, жақсылық, жаратыўшылық, ийгиликли ислерге жәмлестириўшилик хызмети ҳәмийше жәмийеттиң раўажланыўы, инсанның жоқары пазыйлетли болып камал табыўында хызмет етип келген.
Лекин, бүгинги күни өзиниң жаман нийетлерин әмелге асырыўда ислам дини нықабы астында жумыс алып барып атырған экстремистлик шөлкемлердиң тийкарғы бөлеги басқышпа-басқыш әмелге асырылып атырған конституциялық дүзимди бийкарлаўға, ҳәкимиятқа қарсы ғалабалық наразылықлар шөлкемлестириў, мәмлекетти басқарып турған басшыларды ҳәкимияттан шетлестириў режесин такфир, ҳижрат, жиҳад ҳәм шахидлик идеялары тийкарында басқышпа-басқыш әмелге асырыўға умтылмақта. Ашынарлы тәрепи сонда, усы шөлкемлер өз ҳәрекетлерине ер адамлар менен бир қатарда ҳаялларды да өз сапларына тартып, олардан терроршы сыпатында пайдаланыўды ҳәм имканы болғанынша қурбанлар санын арттырыўды гөзлеп бузғыншы нийетлерин әмелге асырмақта.
Экстремистлик ағым ағзалары көпшилик жағдайда өзлери ағза болған бирлеспеген, ең алды менен өз ҳаяллары, аналары ҳәм апа-сиңлилери, сондай-ақ, экстремистлик идеяларды тарқатқаны ушын жазаны өтеў колонияларында жаза мүддетин өтеп атырған инсанлардың жақын-жуўықларын қатарына тартпақта.
Эксперт ҳәм қәнигелердиң пикиринше, бүгинги күни айырым аймақлар ушын айрықша машқалалардан бири болып баратырған мәселе бул ҳаяллардың экстремистлик топарлар тәсирине түсип қалыўында Өзбекстанға шегаралас қоңсы мәмлекетлердиң сезилерли дәрежеде тәсири барлығын бийкарлап болмайды. Буннан шама менен бес-он жыллар илгери экстремистлик топар ҳәм ағымлар топарына түсиў көпшилик жағдайда ер адамларда бақланған болса, бүгинги күнге келип бул унамсыз жағдайлардың ҳаяллар арасында да кең тарқалып атырғанлығы оғада өкинишли жағдай, әлбетте. Ҳаяллардың пул табыў мақсетинде шет еллерге барып жумыс ислеўлери яки керисинше журтымызға жумыс ислеў ушын келген ҳаяллардан пайдаланыў да радикал ағым ўәкиллери ушын жүдә қол келип атырған себеплерден бири.
Дүньяның түрли орынларында жүз берип атырған терроршылық ҳәрекетлери, қан төгиспелер, халқымыз, ең алды менен өсип киятырған жас әўладта фанатизм, өз-ара келиспеўшилик, урыслардың аянышлы ҳәм ўайрангершилик ақыбетлери ҳаққында системалы, ақыллылық пенен пикир жүргизиўди, журтымыз пуқаралары, әсиресе, жаслар ҳәм ҳаяллар санасын зәҳәрлеўге урынып атырған күшлерге алданып қалмаў мақсетинде идеологиялық иммунитетин арттырыў ҳәм орынларда күшейтилген руўхый-ағартыўшылық үгит-нәсият жумысларын алып барыўды әҳмийетли ўазыйпа етип қоймақта. Солай екен, профилактика инспекторлары мәҳәллелерде рәсмий емес тәризде жумыс алып барыўға ҳәрекет етип атырған шахслар жумысларын қадағалаўға алыўлары, диний тараўға байланыслы машқала ҳәм саўаллар менен әйне усы тараў қәнигелерине мүрәжат етиўлери тек ғана пайда келтиретуғыны турған гәп.
Б.ҚУРБАНОВ.
