Еркин Қарақалпақстан Вести Каракалпакстана 19:11:40, 22.09.2019
Хош келипсиз! | RSS
Сайт мазмуны

Кириў усылы

«БАЛАЛАРЫМЫЗ ҲЕШ КИМНЕН КЕМ ЕМЕС»,

-дейди халықаралық таңлаў жеңимпазы Шынар Альжанова

Илим ҳәм техниканың, инсаният сана-сезиминиң тез пәт пенен раўажланыўы, дүнья жүзилик глобаль өзгерислер заманагөй педагогика ўәкиллерине жаңадан-жаңа ўазыйпаларды жүклеп атырғаны бәршеге белгили. Жәҳән жәмийетшилигинен барған сайын тереңирек орын ийелеп атырған ғәрезсиз мәмлекетимизде бул ҳалат айрықша түс алған, десек асыра айтқан болмаймыз. Дәўир, бүгинги күн муғаллимлеринен мектепке келип, тек сабағын оқытып кетиўди ғана емес, ал, оқыўшыларға заманға сай тәлим-тәрбия бериўди, тек булар менен шекленип қалмай, өзлериниң де билим ҳәм педагогикалық көнликпелерин, интеллектуаллық дәрежесин жетилистирип барыўды талап етпекте.

 

Муғаллимлердиң кәсиплик шеберлигин ҳәм ис-тәжирийбесин арттырыўда олар арасында елимиз көлеминдеги ҳәм халықаралық таңлаўлардың тут­қан орны айрықша. Қуўанарлы тәрепи, бундай таңлаўларда жеңимпаз болған муғаллимлеримиздиң қатары жыл сайын артып бармақта. Бүгинги кәсиплик байрамы мүнәсибети менен олардың бири — пайтахтымыздағы 1-санлы қәнигелестирилген мәмлекетлик улыўма билим бериў мектебиниң рус тили ҳәм әдебияты пәни оқытыўшысы Шынар Альжанова туўралы азы-кем сөз еткенди мақул көрдик.

Қарақалпақстанда саўда тараўының, тутыныўшылар жәми­йети жумысларының раўажланыўына салмақлы үлес қосқан пидайы инсан, Қарақалпақстан Республикасына мийнети сиңген қурылысшы Жеткерген Альжановтың шаңарағында дүньяға келген Шынар балалығынан-ақ рус тили ҳәм әдебиятына айрықша меҳир қойып, келешекте усы пән оқытыўшысы болыўды өзиниң алдына мақсет етип қойды.

— Шаңарақта еки ул, төрт қыз тәрбияландық, - дейди Шынар Жеткергеновна. — Әкем ҳәммемиздиң де оқып билим алыўымызға, жоқары мағлыўмат ийелеўимиз ушын шараят жаратып бериўге ҳәрекет етти. Кишкене пайытымда оның рус тилинде емин-еркин сөйлей алатуғыны мени айрықша қызықтырар еди...

1991-жылы Волгаград педагогикалық институтының рус тили ҳәм әдебияты факультетин питкерип келген Шынар педагогика тараўындағы мийнет жолын Нөкис қаласындағы өзи тәлим алған 19-санлы орта мектепте муғаллим болып ислеўден баслады. Бул жерде азғана ислеген соң педагогикалық хызметин 34-санлы мектепте даўам еттирди. Ал, 2006-жылдан баслап 1-санлы қәнигелестирилген мәмлекетлик улыўма билим бериў мектебинде оқыўшыларға рус тили ҳәм әдебияты пәни сырларын жалықпастан үйретип келмекте. 2007-жылы «Жыл муғаллими» таңлаўында Қарақалпақстан Республикасы бойынша жеңимпаз болған ол таңлаўдың Ташкент қаласында өткерилген жуўмақлаўшы басқышына да мүнәсип қатнасып, лауреат атанды. Усындай жетискенликлери ушын сол жылы «Қарақалпақстан Республикасы Халық билимлендириў ағласы» көкирек нышанына ийе болды.

Шынар Альжанова ушын быйылғы жыл оғада табыслы келди. Ол Москва қаласында рус халқының уллы шайыры А.С.Пушкинниң атына рус тили ҳәм әдебияты пәни муғаллимлери арасында жыл сайын дәстүрий түрде өткерилип киятырған халықаралық таңлаўдың лауреаты атанды. Быйыл 15-мәрте шөлкемлестирилген бул таңлаўға 2000-жылы «Российская газета» басылымы ҳәм Россия Сыртқы ислер министрлиги менен «Русский мир» фондының қоллап-қуўатлаўында Москва қаласының сыртқы экономикалық ҳәм халықаралық байланыслар департаменти тәрепинен тийкар салынған болып, оның мақсети — жақын ҳәм алыс сырт еллердиң талантлы рус тили ҳәм әдебияты пәни оқытыўшыларын қоллап-қуўатлаўдан ибарат.

Отыз мәмлекеттен 50 муғаллим лауреат болған быйылғы таңлаў «Жеңис тили. Сизиң оқыўшыларыңыз 1945-жылдың майы ҳаққында не биледи?» деп аталып, оған Шынар екинши жәҳән урысы жылларында Өзбекистан халқының меҳрибаншылығы, эвакуация етилген көплеген адамлар ушын елимиздиң екинши Ўатан болып қалғаны туўралы жазылған эссесин жиберген еди.

Усы жылдың 3-7-сентябрь сәнелеринде Ш.Альжанова таңлаўдың Москва қаласында өткерилген сыйлықлаў мәресимине қатнасып қайтты.

— Мәресимнен алған тәсирлеримди сөз бенен жеткериў қыйын, - дейди ол. — Барлығы әжайып тәризде шөлкемлестирилген. Таңлаў барысында Москваның дыққатқа ылайық орынларын тамашаладық. Театр ҳәм музейлерге бардық. Менде ең айрықша тәсир қалдырғаны — Москваның ең алдынғы мектеплерине барып, тәжирийбе алмас­қанымыз болды. Ҳәммеси заманагөй билимлендириў стандартларына сай, оқытыўшылары да, оқыўшылары да жүдә саўатлы. Бирақ, бир аңлағаным, бизиң елимиздиң муғаллимлери менен оқыўшыларының билими олардан ҳасла кем емес...

Шынар Альжанова тәжирийбели педагог болыўы менен бирге үлгили үй бийкеси де. Өмирлик жолдасы Муратбек пенен бир ул, бир қызды тәрбиялап, камалға келтирди. Олар жоқары оқыў орынларын питкерип, ҳәзирги ўақытта өз қәнигеликлери бойынша мийнет етпекте.

Өз кәсибине шын берилген, жас әўладқа заманагөй педагогикалық технологиялар тийкарында тәлим-тәрбия бериўди мақсет еткен Шынар Альжановадай муғаллимлеримиз бар екен, елимиз келешеги ийелериниң ертеңги күни исенимли қолларда екенлигине гүман жоқ.

С.ЖАНИЕВ,

өз хабаршымыз.

СҮЎРЕТТЕ: Таңлаўдың Қәўендерлер кеңеси баслығы В.Никоновтың Шынар Альжановаға диплом тапсырып атырған пайыты.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF