ХАЛЫҚ ПЕНЕН ПИКИРЛЕСИЎДИҢ НӘТИЙЖЕЛИ МЕХАНИЗМИ
Пуқаралардың мүрәжатлары менен ислесиў системасын түп-тийкарынан жетилистириў, халық пенен ашық-айдын пикирлесиўди жолға қойыўдың жаңа нәтийжели механизмлерин ҳәм усылларын, лаўазымлы шахслардың халық алдында есап бериў системасын турмысқа енгизиўи, усы тийкарда халықтың мәмлекетлик ҳәкимиятқа болған исенимин беккемлеўге бағдарланған илажлар бүгинги күнде ҳүкиметимиз тәрепинен алып барылып атырған сиясаттың баслы бағдарларының бири.
Жақында Нөкис қаласындағы Спорт комплекси имаратында Өзбекстан Республикасы Әскерий прокуратурасы тәрепинен көшпели қабыллаў шөлкемлестирилди. Оған Өзбекстан Республикасы Әскерий прокуратурасы прокуроры И.Абдиҳакимов, Қарақалпақстан Республикасы Халық қабыллаўханасы баслығы Ҳ.Халимов, Арқа-батыс әскерий округының басқарыў аппараты, Нөкис әскерий прокуратурасы, Қарақалпақстан Республикасы Қорғаныў ислери басқармасы ҳәм Нөкис қалалық Қорғаныў ислери бөлими, Қарақалпақстан Республикасы Ишки ислер, МОБ, Халық билимлендириў ҳәм мектепке шекемги билимлендириў министрликлери, Қарақалпақстан Республикасы Орайлық банки, Бәнтлик ҳәм мийнет қатнасықлары министрлиги, Өзбекстан Республикасы Жаўынгер ветеранлар ҳәм майыплар шөлкеминиң Қарақалпақстан Республикасы бөлими, Өзбекстан Республикасы Жаслар аўқамы Қарақалпақстан Республикасы Кеңеси ҳәм басқа да мәкеме, шөлкемлерден жуўапкер қәнигелер, ғалаба хабар қураллары ўәкиллери қатнасты.
Көшпели қабыллаў барысында пуқаралар тийкарынан жумыс пенен тәмийинлеў, өз исбилерменлигин жүргизиў, банктен жеңиллетилген кредитлер алыў, жоқары оқыў орынларына кириў ҳәм тағы басқа да машқалалар бойынша 300ден аслам пуқаралар мүрәжат етти. Бул мүрәжатлардың басым көпшилиги унамлы шешимин таўып, айырым мүрәжатлардың ийелерине ҳуқықый мәсләҳәтлер берилди.
Ҳақыйқатында да, бүгинги күнде Халық қабыллаўханалары шын мәнисинде пуқаралардың өз шешимин күтип турған машқалаларын өз ўақтында унамлы шешиўге хызмет етиўши орайға айланды. Себеби, ҳәр бир мүрәжаттың артында инсан тәғдири бар.
Бундай көшпели қабыллаўлар пуқаралардың мәмлекетлик ҳәкимиятқа, жәмийетке ҳәм ертеңги күнге болған исенимин арттырыўда оғада әҳмийетли саналады. Орынларда өткерилген бул тәриздеги көшпели қабыллаўлар пуқаралардың мүрәжатларының өз ўақтында унамлы шешимин табыўына имкан жаратпақта.
Сағынбай ОРАЗЫМБЕТОВ,
өз хабаршымыз.
СҮЎРЕТТЕ: көшпели қабыллаўдан көринис.
Автордың түсирген сүўрети.
