Еркин Қарақалпақстан Вести Каракалпакстана 19:56:26, 25.08.2019
Хош келипсиз! | RSS
Сайт мазмуны

Кириў усылы

МИЙЎЕ-ПАЛЫЗ ӨНИМЛЕРИН ЭКСПОРТ ЕТИЎ ЖЕҢИЛЛЕСТИРИЛДИ

Өзбекстан Республикасы Президентиниң  2018-жыл 17-октябрьдеги «Мийўе-палыз өнимлерин сыртқы базар­ларға шығарыў нәтийжелигин арттырыўға байланыслы қосымша илажлар ҳаққында»ғы қарарының орынланыўын тәмийинлеў мақсетинде 2019-жыл 23-февральда Өзбекстан Республикасы Министрлер Кабинетиниң «Мийўе-палыз өнимлерин экспорт етиў тәртиби ҳаққындағы нызамын тастыйықлаў ҳаққында»ғы қарары қабыл етилген болып, усы қарар тийкарында мийўе-палыз өнимлерин экс­порт етиў тәртиби ҳаққындағы Реже тастыйықланды.

Тастыйықланған Режеге муўапық исбилерменлик субъектлери көтере саўда етиў лицензиясына ийе болмастан мийўе-палыз өнимлери экспортын әмелге асырыў ҳуқықына ийе екенлиги, бирақ, бунда жеке тәртиптеги исбилерменлер мийўе-палыз өнимлерин экспорт етиўден түскен түсимлерине бирден-бир салық төлемин төлеўди нәзерде тутатуғын тәртип қолланылады.

Экспорт етиўши юридикалық шахслар мийўе-палыз өнимлери экспортын дәслепки төлемсиз, аккредитив ашпастан, банк кепиллигин рәсмийлестир­местен ҳәм де экспорт шәртнамасын саўда қәўиплеринен қамсызландырыў полисисиз әмелге асырыў ҳуқықына ийе. Ал, жеке тәртиптеги исбилерменлер мийўе-палыз өнимлерин  дәслепки төлем, аккредитив ашыў яки сатып алыўшы банклердиң кепиллиги бар болатуғын шәртлердиң бири болғанда экспорт етиў ҳуқықы бериледи.

Бажыхана нызам ҳүжжетлери бузылыўы қәўпи белгилери анықланбаған жағдайда, мийўе-палыз өнимлериниң бажыхана рәсмий­лестирилиўи экспорт етиўши тәрепинен усынылған ҳүжжетлер тийкарында бажыхана тексериўинен өткерилместен әмелге асырылады ҳәм бундай өнимлер жүкленген транспорт қуралына бажыхана рәсмийлестириўин әмелге асырған бажыхана уйымы тәрепинен идентификация қураллары орнатылады. Бул жағдайда ҳүжжетлердеги бар болған мағлыўматлардың исенимлилигине, сондай-ақ, өнимлерди Өзбекстан Республикасы бажыхана шегарасынан нызамсыз алып өтиў жағдайлары ушын экспорт етиўши жуўапкер болып есапланады.

Экспорт операциялары бойынша бажыхана жүк декларациясы рәсмийлестирилген сәнеден  баслап төлем мүддети өткерип жиберилген дебитор қарыздарлықлардың пайда болыў мүддети мийўе-палыз өнимлери ушын l20 календарь күн етип белгиленеди.

Исбилерменлер экспорт шәртнамасын дүзбестен инвойс тийкарында мийўе-палыз өнимлерин Өзбекстан Республикасының коммерциялық банклериндеги есап-бетлерине Өзбекстан Республикасы резиденти болмаған шахслардан сырт ел валютасында банк өткермелери, сондай-ақ, сырт ел яки миллий валютадағы нақ пулларын белгиленген тәртипте банк кассаларына киргизиў арқалы l00 процент алдыннан төлем шәрти менен экспорт етиў ҳуқықына ийе.

Экспорт шәртнамалары бойынша экспорт етилген жаңа үзилген мийўе-палыз өнимлерин белгиленген жерге шекем транспортта тасыўда усы Режениң қосымшасына муўапық белгиленген нормативлер бо­йынша тәбийғый жоғалтыўлар болған жағдайда, экс­порт етилген мийўе-палыз өнимлериниң фактура қунына өзгерислер киргизилиўи мүмкин ҳәм де бул ҳаққында сыртқы саўда операцияларының бирден-бир электрон хабар системасына мағлыўмат киргизиледи.

Тәбийғый жоғалтыўлар суммасы хызмет көрсетиўши банк тәрепинен электрон системаға киргизилип, усы мағлыўмат тийкарында экспортқа жүкленген өнимлердиң суммасынан айырылады, нәтийжеде пайда болған сумма сырт елдеги шеригине қайтарылады яки болмаса кейинги жеткерип берилетуғын өнимлер ушын алдыннан төлем сыпатында есапланады. Бирақ, бул жағдайда экспорт бажыхана жүк декларациясында көрсетилген фактура қунына өзгерис киргизилмейди.

Бажыхана жүк деклара­циясында мийўе-палыз өнимлериниң фактура қуны инвойстағы валютада көрсетилип, коммерциялық банк­лер тәрепинен миллий валютадағы пуллары ҳаққындағы мағлыўматлар электрон сис­темаға киргизилген жағдайда, мийўе-палыз өнимлериниң миллий валютадағы эквиваленти бажыхана жүк декларациясы қабыл етилген ўақыттағы Өзбекстан Республикасының Орайлық банки тәрепинен белгиленген курс бойынша бажыхана рәсмийлестирилиўинде көрсетилген суммадан аспаўы тийис.

Және де усы Реже тийкарында мийўе-палыз өнимлерин ҳадал емес экспорт етиўшилер реестри әме­лиятқа енгизилген болып, яғный, электрон системаға киргизилген экспорт шәртнамасы бойынша төлем мүддети өткерилип жиберилип, дебитор қарыздарлығы болған экспорт етиўши реал ўақыт режиминде автоматластырылған түрде қәлиплесетуғын ҳадал емес экспорт етиўшилер реестрине киргизиледи.

Өткерилип жиберилген дебитор қарыздарлығы болған шәртнамалар бойынша қарыздарлық суммасына жетерли муғдарда пул келип түскен жағдайда, усы келип түскен пуллар ҳаққында хызмет көрсетиўши банк тәрепинен электрон системаға киргизилгеннен соң усы реестрден автомат рәўиште шығарылады.

Реестрге киргизилген ҳадал емес экспорт етиўши кейинги экспортын тек l00 процент алдыннан төлем шәрти тийкарында әмелге асырыўы мүмкин. Бунда бирден-бир интерактив мәмлекетлик хызметлер порталына жайластырылады ҳәм Өзбекстан Республикасы Инвестиция ҳәм сыртқы саўда министрлиги ҳәм Мәмлекетлик бажыхана комитетиниң веб-сайтлары арқалы интеграция етиледи.

 

Нурлыбек ХОЖАНОВ,

Қарақалпақстан Республикасы Бажыхана бас­қармасы

баспасөз хызмети аға инспекторы.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF