Еркин Қарақалпақстан Вести Каракалпакстана 13:14:12, 26.05.2019
Хош келипсиз! | RSS
Сайт мазмуны

Кириў усылы

СУЎ — ТИРИШИЛИК ДЕРЕГИ

Жақында Ташкент мәм­лекетлик аграр университети Нөкис филиалында Өзбекстан Республикасы Суў хожалығы министрлиги,  Европа аўқамының Орайлық Азия регионындағы Экология орайының Өзбекстандағы ўәкилханасы ҳәм «Суўшы» жә­мийетлик бирлеспеси менен биргеликте Европа Аўқамының «Өзбекстанның аўыллық аймақларында суў ресурсларын турақлы басқарыў» бағдарламасы ҳәм «Өзбекстанда суў ҳәм қоршаған орталық мәселелери бойынша хабардарлықты арттырыў ҳәм бирге ислесиўди раўажландырыў» жойбары шең­беринде Қарақалпақстан Республикасында «Мәмлекетлик емес, коммерциялық емес шөл­кемлер, мәмлекетлик шөлкемлер, жаслар аўқамы ҳәм халық ушын» атамасында семинар-тренинг болып өтти.

Семинар-тренингке  ғалаба хабар қураллары, суў хожалығы ҳәм экология тараўында ислейтуғын жергиликли шөлкем ўәкиллери, соның менен бирге, «Суўшы» жәмийетлик бирлеспеси қәнигелери, Өзбекстан Жаслар аўқамы Қарақалпақстан Республикасы Кеңеси ағзалары қатнасты.

Илажды жойбардың Қа­рақалпақстан Республикасы бойынша консультанты Рашид Көшеков ашты ҳәм тренингтиң алдына қойған мақсет ҳәм ўазыйпалары ҳаққында кең түрде айтып берди. Соңынан Қарақалпақстан Республикасы Суў хожалығы минис­трлигиниң бөлим баслығы Д.Қыдыр­баев, Қарақалпақстан Республикасы Экология ҳәм қоршаған орталықты қорғаў комитетиниң бөлим баслығы М.Аметов, Өзбекстан Жаслар аўқамы Қарақалпақстан Республикасы Кеңесиниң ўәкили Н.Жубатқанов, Қарақалпақстан Республикасы Телерадиокомпаниясы хызметкери Л.Есемуратова ҳәм басқалар шығып сөйлеп, өз пикирлерин билдирди.

 Жойбар басшысы Т.Мажидов  қатнасыўшыларға усынылған Өзбекстан Республикасы «Жер кодекси»ниң тийкарғы  статьялары менен таныстырып өтти ҳәм ҳәр тәреплеме талқылап берди. Қәнигениң атап өтиўинше, Кодекстен 91 статья орын алған болып, бул мәмлекетимизде жерден пайдаланыўды тәртипке салады. Бул Кодекске бир қанша өзгерислер енгизилгенин де айтып өтти.

Буннан тысқары, қатнасыўшыларды басқа ўәлаятларда өткерилген илажлар менен таныстырыў мақсетинде ўәлаятлардың радио-телевидениелеринде берилген көрсетиўлер көрсетилди. Сондай-ақ, «Суў — алтыннан әзиз» радиоинсценировкасы менен «Суў ­ кәраматлы», «Суў — ғәзийне» атамасындағы видеофильмлер қатнасыўшылардың нәзерине усынылды.

«Экология ҳәм суў ре­сурслары» темасындағы презентация материалларындаҮ жер шарының экологиялық машқалалары, булардың түрлери — глобаллық, ре­гионаллық ҳәм локальлық болып бөлиниўи, соның нәтийжесинде жүзеге келетуғын машқалалар, булар — глобал  экологиялық машқалалар — атмосфераның туншығыў ҳәдийсеси, озон қатламының жемирилиўи, ашшы суў, пестицидлерден пайдаланыў, регионаллық машқалалар ҳәм оларды жумсартыў бойынша илажларҮ Арал ҳәм Аралбойы машқаласы, Арал теңизин қайта тиклеў жойбарлары, Әмиўдәрья дельтасында киши суў бассейнлерин қурыў жойбары, қурыған Арал теңизи түбинде қор­ғаныў тоғайзарлықларын пайда етиў, локальлық экологиялық машқалалар, ири аймақлық санаат комплекс­лери жайласқан регионларда (Ангрен, Алмалық, Шыршық, Ферғана-Марғулан, Наўайы) тәбиятты қорғаў, суў ресурсларын қорғаў ҳәм олардан үнемли пайдаланыў, агросанаат комплексиндеги экологиялық машқалалар, тәбияттағы суўлардың санаат шығындылары, пестицидлер ҳәм минерал төгинлер менен патасланыўы ҳәм ишимлик суў машқаласы, мәмлекетимизде ықлым өзгериўи процеси ҳәм оның унамсыз ақыбетлери, қоршаған орталықты қорғаў тараўындағы ҳуқықбузарлықлар ушын жуўапкершиликтиң күшейтилгенлиги сыяқлы мәселелер айтыл­ған.

Илаж соңында қатнасыўшылар жойбар орынлаўшыларына өзлерин қызықтырған саўалларын берип, тийисли жуўапларын алды. Сондай-ақ, қатнасыўшылардың пикирлери де тыңланды.

Сағынбай ОРАЗЫМБЕТОВ,

өз хабаршымыз.

СҮЎРЕТТЕ: семинар-тренингтен көринис.

Автордың түсирген сүўрети.

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF