Еркин Қарақалпақстан Вести Каракалпакстана 05:00:05, 27.06.2019
Хош келипсиз! | RSS
Сайт мазмуны

Кириў усылы

«АРАЛ» ҚОЛЛАП-ҚУЎАТЛАЎҒА МҮТӘЖ

Футбол бойынша Өзбекстан миллий чемпионаты суперлига клублары 2019-жыл­ғы мәўсимди баслағанынан хабарыңыз болса керек.

ӨФА (Өзбекстан Футбол ассоциациясы) ҳәм ПФЛ (Профессионал футбол лигасы) суперлига клубларының санын 12 ден 14 ке көбейтти, яғный, өткен жылы Нөкистиң «Арал» клубы қатнасқан пролига «А» топарында 1-орынды ийелеген «Әндижан» ҳәм 4-5-орынларды алған «Сурхан» (Термиз) ҳәм «Динамо» (Самарқанд) клублары ўәлаятлар ҳәкимияты басшыларының өтинишин, клуб қәрежетлери, стадионларының суперлига талапларына жуўап беретуғынын есапқа алып, бул командаларды суперлигаға қабыл етти.

Қарақалпақстан Республикасы, Нөкис қаласы ҳәкимияты ҳәм «Арал» футбол клубы жәмәәти басшылары командамызды бы­йылғы мәўсимде пролиганың «А» топарында емес, ал, «В» топарында қатнастырыўды мақул көрди. Бизиңше, буған пролига «А» топары 8 күшли, қәрежетлери жетерли клублардан қуралғаны, «Туран» стадионының ҳәр түрли себеплерге байланыслы мәўсимге таяр емеслиги ҳәм тағы басқалар себеп болған. Усыларды есапқа алып, республикамыз, пайтахтымыз басшылары Футбол федерациясы менен келисилген ҳалда бурынғы футбол-интернатта Президентимиздиң 2018 жылғы l6-марттағы Пәрманы ҳәм ӨФА қарары бойынша ашылған футбол академиясында тәрбияланып атырған, 2000-жылдан кейин туўылған жас футболшыларды пролига «В» топарында тәжирийбе арттырып, кейинги жылы «А» топарында, буннан соң болса суперлигада ойнап кететуғын футболшыларды жетилистириў ўазыйпасы қойылды. Узақты гөзлеп қабыл етилген бул қарарды футбол жанкүйерлери дурыс түсинеди ҳәм қоллап-қуўатлайды деген үмиттемиз.

«Арал» футболшыларының быйылғы қурамына тоқталып өтетуғын болсақ, командаға көп жыллар даўамында ойнаўшы тренер болған, тренерлик сертификатына ийе Тимур Турдыев басшылық етсе, Аббас Шәмшетдинов оның жәрдемшиси, Айбек Ақназаров болса клуб басшысы етип та­йынланды.

Жоқарыда айтқанымыздай, келешекте суперлигада қатнасыў ушын «Туран» стадионындағы жумысларды, яғный, орайлық трибунаның 3-қабатын оңлаў, жоқарыдағы трибуна отырғышларын орнатыў, төрешилерге, мийман клубқа жақсы шараятлар жаратыў керек. Прожекторлардың жақтылық қуўатлылығын арттырыў, 11 жылдан берли пайдаланылып киятырған газонды алмастырыў ҳәм «Арал» клубы базасын тәмийинлеў, сапар ойынларына барыў ушын автобус пенен тәмийинлеў, қаржы мәселесин шешиў усаған әҳмийетли ўазыйпалар тур.

Рети келгенде айтыўымыз орынлы, пайтахтымызға және бир үлкен футбол ушын арналған, ажырық өсирилген, ҳәзирше үш мың адамлық трибуна болса да стадион керек. Себеби, Президентимиз Пәрманы ҳәм ӨФА қарарында футбол академиясында тәрбияланып атырған жас футболшыларға ҳәзирги заман талабына жуўап беретуғын жағдай туўғызыў лазымлығы көрсетилген.

Сонлықтан, 2021-жылы бурынғы кийиз завод орнынан стадион салыў жобаластырылған деп күтип отырғаннан көре ҳәзирден баслап бос жер таўып, бизиңше, «Дослық» каналы менен газ басқармасы аралығына көк шөп егип, 60х110 метрлик майданша, трибуна ушын 25 метр ықшам стадион қурылысын баслаған мақул болар еди.

Және бир мәрте «Арал» клубы қурамына тоқтасақ, жас футболшылар менен бирге тәжирийбели Наўрыз Қайыпов, Дамир Нызанов, Бахтияр Аразов, Жәўлан Пиримбетовлар шуғылланбақта.

Пролига «В» топары ойынлары 11-апрель күни старт алады. «Арал» усы күни өз майданында Жиззақтың «Замин» клубын қабыл етеди.

 

Тайырбек ИБРАГИМОВ.

Нөкис қаласы.

 

Излеў

Көп оқылған мақалалар

Сыбайлас сайтлар

Қарақалпақстан Республикасы Жоқарғы Кеңеси ҳәм Министрлер Кеңесиниң газеталары.
Қарақалпақстан баспасөз ҳәм хабар агентлигинде 2007-жыл 7-февральда дизимге алынған. Гүўалық № 01-001
Developed by TUIT NF